HNEH THEIHLOH HNEHTU, THIHNA

Hlauh nei lo, huphurh leh zam nei ngai lo, thlaphanga thlabar ngai bawk lo, thin phût zeuh pawh nei inti duh lo, sehhel, tuarchhel, hrâm leh hriam pal tlangtu, rilru natna tawpkhawk pawh hnehtu ti a, a chanchin ka sawi mek hi ka pa a ni.

Lung valve ṭha lo pawh tuar dam hmak thei a ni a, Heart attack vawi engemaw zat neih hnu pawh a, kut hnathawh chhunzawm leh ngat duh khawpa tumruh leh sehhel a ni. Chuap TB in a chuap a tihchhiat viau hnu leh Cancer emaw tih hial khawpa a nat avanga, thi leh dam kara BCCI, Guwahati thlenga an phurh thlak, ka pa khan kum 3 hnu ah chuan Oil Palm hmun siamin Zawlpui ramah a rammu leh ngat a sin. Khami ṭuma Sumo a Guwahati an phurh thlak khan a chakna pawn a tlin loh ve lek lek thu min hrilh a ni.

Sikserh leh natna dang a paltlang zozai te kha chu heng ka sawi a natna tawrh ho lakah chuan thil tenau mai an ni e. Eng dinhmunah pawh ding se a zam ngai lo a, a talbuai ngai lo. 

Hripui a lo leng a, a tawp dawn a ruai ah a kai ve tlat mai. A natna tawrh tawh te kan ngaihtuahin a nupui fanaute chu kan mangang a; TB in a chuap a tih chhiat tawh, lung thatlohna lo nei tawh, Zunthlum sang em em ṭhin tan chuan Covid vei kha a cho awmloh ve bawk a ni.

ZMC a phurhphei ngai chi in a tuar na ta reng bawk a, a manganthlak a sin. Kawnglakah khan Oxygen cylinder bur 7 kan hman zo a, Chamring dai leh Thiak pelha a SPO² 45 reading vela a tlak hniam lai khan a bulah pawh ka awm ṭha ngam lo. Mangang hmel a pu miah lo a, harsa taka thâwk la chungin Ambulance chhungah a ṭhu ngeng ngar mai a ni. Ka mitthla let leh hian Ka pa han 'pa' em em dan kha ka chhuang a ni. A ni ang kha kan chhûngkaw thlah kal zelah hian piang leh tak ang maw? A mak hran lo, ama in chhal dan angin Pasaltha Chawngbawla thlah kha a ni miau a ni.

Mahse Damdawi thiam leh Damdawi ebkawlna chuan a tlin ta ngang lo a, ZMC aṭanga a let leh hnu ah Lunglei Civil Hospitalah Heart attack vangin a nunna a thlah ta a ni. Engmahin a hnehtheih loha ka lo ngaih, hringnuna hneh theihloh nun neitu ni hiala ka dah, ka pa pawh chu Thihna chuan a lo hneh ve thei reng a lo ni.

Sualna hnehna leh kan rinna laimu chu Kraws lera Isua Krista thihna hmanga hnehna a chan kha a ni. Thihna hian mihring leh chu mihringa famkim lohna leh sualna zawng zawng chu a lo hneh vek a, chu thihna avang chuan nunna kan lo chang ta a ni. Ka pa pawh khan a hringnuna harsatna tam tak a tawrh te kha a thihna chuan a hneh sak tawh a, tunah chuan nun thar tha zawkin a nung ngei ang.

RAMHUAI KA HMU !!!

Ṭhangkhatlian chu a liam ve ta reng mai. MZU Boys Hostel, Tanhrila kan awmlai a ni a, he hostel luah hmasa bertu batch kha kan ni. Chunglai chuan MZU Campus khu ramhnuai anga ngaih a la ni a, ramhuai thâwm te pawh a awm thu sawi fo ṭhin a ni bawk, tak tak a ni em tih erawhchu ka hre lo. Ka room ṭhenawmpa Hminga hian thawm chu a hre ṭhin a ni awm e. Reiek ruama zantin Khuang nena zai tlaivar ṭhin te kha tu te tak ni ang maw? 

MZU Campus aṭanga AICS hi mel chanve vel leka hla a ni a, a inkarah hian Soil Dept Quarters rauhsan tawh, an sawi hrân viau hi a ding âwn bui bawk a, thim hnu ah chuan a nelawm viau loh ṭhin. Tlai khat chu AICS a ka unaupa BD zirlai va kawmin ka leng phei a, kan titi tui ta lutuk kha haw nachang ka lo hre leh pek lo chu ni in, haw tuma pawn ka chhuak chu khua a lo thim mup tawh mai a ni.

Riah ngawt thu awm suh, phur lo zetin Hostel lampan chuan ka haw phei ve ta hnak hnak a. Chutichuan le, Soil Quarters thlen hma, Sihtui pelh chho ka kal ṭan chiah tih chuan ka hmalam kawngsir hnimbuk chu a che ta lui lui mai a. Ka ding dawt, 'unau hmelhai' chu a pel tawh na in hmazawna thil awm chu a la hmuh vuai vuai theih. Sihdet leh êng pechhuak thei chi engmah ka pai bawk si lo, ka hmazawna hnim buk chu a che chiang a ni.

Ngaihtuahna fim tak pului chunga uluk taka ka en hnu pawn a che a ni. A che a ni satliah lo, a insawi buk buk a, ka lam a la rawn pan zui lehnghal. Ramhuai ka hmu ve ngei dawn ta e tih chu ka ngaihtuahna a ni a, ka van phur lo tak em! Phurlo ka ni satliah lo ka hlau a ni. Tlanchhiatsan ni ila, chu kawng chu Tanhril khawchhûng atanga hel a ngai dawn a, a kual lutuk. Pal tlang dawn chuan Palian dun ren run hian rapthlak theihpatawpa min lo chhiat khum ka hlau bawk si. Ka khur êm lo a, hlauh luat vangin zun pawh ka cheh bik lo.

"Hlauhawm tawh changa inngaihtuah fîm hman apiang hian huaisen nih an hlawh ṭhin" tih thu ka pa min hrilh kha ka hrechhuak zawk a, in ngaihtuahfîm hram hrâm chu tum mahila harsa tak a ni. "Saw hnimbuk che lui lui tawk zawng sawn ka kal anga, a lo rapthlak viau chuan ramhuai speed aia chakin ka tlanchhe mai ang" ti a rilru siam chungin hmalam chu ka pan ta a ni. Ka huaisen vang a ni lo, kawng dang a awm loh vang zawk a ni.

Ka hnaih zel a, thinphu a rang tulh tulh, pen sawm pawh a ni tawh lo ang tih ah chuan thlan a sa bat tawh. Min lo hmutu chu awm se ka ke pén kha a muang viau tawhin ka ring a ni, kawng lah chu a lang zîm phei tulh tulh bawk a. Rilru a "On your mark... Get set... Run..." ti chungin chu hnimbuk che luih luih chu ka pel ta fua a. 

Khai a...a lo rapthlak bawk em a ni !! Zanthim hnuaia Vai Bawngchaw phur pahnih inzui han hmuh kha chu.....

THLA HMASA, KA AIZAWL ZIN DIARY

(Tih tur awmlo e mai, chhiar peih tana post mai mai a nih hi)

Shillong to Aizawl thlawhna cancel thut an chin avangin Guwahati to Aizawl ticket ka la a, zing dar 9:50 a thlawkchhuak tur kan nih avangin dar 8:50 ah chuan Airport thlen hman ngei ngei ngai ka ni. Ka nau Ban-a nen thawh kan hai dun pek a, zing dar 6: 20 ah Shillong aṭangin kan chhuak hman chauh mai. Kan car speed kha 60 kmph ai hniama tlan a rem mawlh lo, darkar 2 leh minute 30 chhunga Km 130 tlan thleng hman tur chuan. Zunram thiar leh truck lian zui sual palh a awm lo thei lo si a.

Khanapara Guwahati chu dar 8 ah kan thleng na in Airport road ah chuan Traffic chu a lo jam namen mai construction vangin. Hman aṭang tawh khan Fly over siam thar an neih reng avang hian Guwahati hi traffic a jam reng mai a, an hmasawn vang a ni. Keini chu fly over kan siam tum kan la siam loh vangin kan jam a, hma kan sawn loh avângin.

Dar 9:20 ah Airport chu engtin tin emaw ka lut a, security check leh Boarding chu ka pawimawh vang ni lovin ka tlai luat avangin queue ka short cut par par a, a nuam miah lo a, a hreawm zawk takzet a ni. Thutna ka rem fel hnu reilote ah Thlawhna chu thlawhchhuah tumin a in her nghal muai muai a ni. Thingtlang Bus passenger lut hnuhnung ber thlen ruala driver engine start nghal ang deuh kha ka chan e. Ni dang ang lo takin Min 40 tling lovah Lengpui kan ṭum der mai, zinkawng tluanglo tak tluang viau si chu ka ni mawlh e.

Hmelhriat hlui te, kan khawchhuak hmelhriatte ka in hmu in kan ri hlut a, a nuam e. Mahse tuman an motora chuang ve turin min sawm lem lo (Ka beisei pawh a ni chuang lo a). An nikhua lo tak tak a ni. 😂 Chutah ILP ti fel zo vaipa, Mizotawng thiam chuan a private car a chho ve turin min sawm mauh mai, ka chaw ei min la nghak zui bawk. Tichuan Kamrula Airport chu ka ṭhian chhar thar Pu Alama nen chuan hlim takin Aizawl pan turin kan chhuahsan ta a ni.

A ni 2 na ah chuan Aizawl District Court panin ka liam thla nghal a, Treasury Sq. ah a lo awm awm tawh awzawng lo mai. New Capital Complex a District Court Building thar chu ka bo viau hnu ah ka zuk thleng ve hram a, a ropui ngei mai. Court kal hi nuam ka ti fahran ngai lo a, Ukil inzui duah duah te hi hmuhnawm pawh ka ti lo. Zawhna chhan har deuh deuh min zawttu tur an ni ṭhin a, ka ngaina lo a ni. Kan mizoram Ukil chhuanawm tak tak te hi hetianga Court an sawn takah chuan hun harsa deuh an tawk a, an chamber a hla lutuk hian an hna a ti khaihlak viau a ni awm e. 

Darkar 5 dawn lai Court room chhunga kan inchhaih hnu chuan lehlam pawlte nen kuhva kan intheh ham ham thei tawh. Hei hi Mizo nih nawmna chu a ni. Mizo ukil te hi an thiamin hma pawh an sawn a, kan case khawih lai chu hriatchian an tumin an inzir thar nasa tih pawh ka hmuthiam vek mai, an chhuanawmin hma han sawn zel teh se. Infrastructure tha tak hnuaiah hna an thawk thei tawh a, chamber sawn hnaihna erawh chu an ngai deuh a ni. An ni hi rorelna kal dik tura mipui aiawha ding, mipui ten kan chanvo leh dikna humhalh tura kan hma theh an ni a. Sorkar lam tan pawh kan kutke pawimawh an ni.

Ka hna zualpui chu ni 2 na ah ka zo a, ni 3 na leh ni 4 na chu vahkualna atan hun ka hmang zui a, scooty leh Bike a ka teikualna ah thil tam tak ka tawng a ni. Vaivakawn ah tlangval naupang tak Eeco Van khalhtu hian Taxi driver, kum lam pawha upa tih hriat tak hi a lo hau hrep mai a, mak ti takin ka thir liam ta ngawt a, Khatiang thil kha ka vawikhat hmuhna a ni.

Chanmari west chho ah ka hma a Taxi ka tlanpelh lai takin Tleirawl Bike khalh nen kan intawk thut a, "I va mawl ve, Zawnga" min han ti ngawt a, mak ka van ti tak! Chhan ngaihna pawh hre lovin ka tlanpel ta mai, ka mawlna pawh ka hre mawlh si lo. 

Mo lawmna ruai ei turin ka nau HPA nen veng mawng lamah kan kal a, keini 2 hi luruh ring ve tak kan ni a, ka lo ṭawng leh lung lung thin a, min en hu hu hlawm. Kan zak thei lo pawh a ni bik lo, zahna chang kha kan hre lo a ni, a zialo ṭhin ngawt mai! Mo lawina program ah te khan kan van nawi dun tak, Professional Cameramen ho hma ah te khan kan mobile tha fahran lo nen khan kan lo video khalh thul ! kan chhangchhia a ti ngawt ang Moneitu Pu Ruatfela khan. Mahse Ruatfela kha a ni miau a ka intithi ve tlat, kan pawi ti lem lo, midang erawh an mit a kham deuh mai thei a ni.

Pu F. Lalṭanpuia

Vawiin khan vuiliam a ni na in keini a naute thinlungah hi chuan a thi ve ngai tawh lo ang . 

Engtinnge a chanchin hi ka sawi ṭan ang le? A puala post siam ve ngei ka duh si a, sawi tur a tam lutuk hian sawi ṭanna turah min tibuai zawk a ni. Pa Puia kha ka pa nen inrual chiah mahse ṭhian kawmin kan kawm ve mai zel a. Amah kha palianlo mahse mi hneh theihna kawnga palian tak a ni. Shillong khawpuiah hian kaihhruai a ngah a, amah lawmtu tam dan leh a titi kotlanga kan hlim ṭhin zia khan a chungnung zia a lantir a ni. Tupawh an kum, an mizia leh an nihna mil ang zela kawm thei a ni a, mi zawng zawng ngaihnat hlawh leh tu pawi mah sawi ngai lo, mi rinawm leh dik, inngaihtlawm kawnga champion a ni. 

 Ṭawngkam thiam satliah ni lo, mahni irawm Zoṭawng phuah chhuak thiam a ni. "Zawngte tui thlum hmu fuh ang maiin a hlim phi cheng mai" tih te leh "Satel mau phel kân ang ṭuah ṭuah" a tih te kha ka hriat ngai loh Mizotawng a ni. A tehkhin thu sawi hi mitthla theih zel a ni a, sawifiah zui vak ngai lovin a fiah em em a ni. Heng ka sawi bak pawh khi ama irawm chhuak thu leh hla tam tak a nei a ni. Vawikhat BMP hnatlan ni a, a titi kal fuh lutuk kan nuihpui rin zia kha aw...

 Corona lai khan ka nupui leh faten an kai avangin rei tak chhungkua kan in khung ve a. Kan fihlim hnu a kan inhmuh hmasak ber ṭuma a thusawi te kha a ril a sin. "Tluangte, a tihzia hle mai, pawi em em awmlo vin nangni chhûngkua chuan in tlâk ta diam bik a nia" zu han ti daih a. Ngaihthlak a van nuam tak. Presence of mind nei ṭha lutuk a ni tih a lantir chiang hle a ni. 

Shillong Bial BMP President ni lai, kan hotupa, kan hmatâwng kan chân ta hi awmdan pawh a naute hian kan thiam lo. A ruang kan zui lo erawh hreawm ti em em in kan awm hlawm thung si a nih hi. Hotupa thihna aṭang hian mihring nunna hi "Chhum reilote lo langa ral leh mai ang" a nih zia min hriatthiam tir zual a ni. 

 Sawi tur a tam hle mai, mahse heti hian ka duhtawk mai ang e. Pathian hian a Nupui leh fa, naupang te te hi thlamuanin awmpui mawlh rawh se. 

 Thubelh: Pu Tpa hi inkhelhthiam S. Malsawmtluanga nu unuapa a ni e.

Ka pa thihcham pualin.

Nikum tun ang hunah kha chuan Shillong atangin Lunglei panin kan chhungkua kan haw a. Ka pa ruang nang hman tumin rilru a hmangmawh nileng a ni ber mai. Zanlai ah phone a rawn ri ral ral a, hlauhthawn ang ngeiin ka pa a beiseiawm tawh loh thu kan hria a, chu mi hnu reilote zing dar 2 ah chiah a kal zui ta a nih kha. Ni 02.02.2022 Zing dar 2 ah chiah a chatuan hmun min pansan ta a ni.

Covid vânglai a ni a, ka nu HQ a nih mek avangin a ruang dahna turah kan buai nghal pang mai. Hospital aṭanga kan vêng thlenpui a nih hnu ah khawlaiah a ruang dahna tur hre lovin chawlhpui a ni te kha a manganthlak a ni. Hun tawngin a zir miau si lo a, HQ na inah in zawn luh ngawt a chi lo a, danin a phal bawk lo a ni. Chutia mangang taka kan awm laiin Kohhran Hall hman min phalsak hlauh a, thawk khat a veng huai. Kohhran hi an lo va hlu tak em!!

Ṭhianpa TMA te leh Muanchhana te an lo lang a, kan insiam chûk chûk a, zing dar 5 ah TMA hovin Aizawl thlawhna man turin Guwahati Airport kan pan ta a ni. Harsatna awm lovin Lengpui kan thleng a, Covid test neuh neuh pawh kan makpa leh ṭhianpa ni bawk Tea zarah a hmasa berah kan zo a,Pa Hma-a'n Lunglei panna tur atan Bolero min lo hire sak chuan hmanhmawhtakin Aizawl kan pan nghal a ni.

Pa Ruaia te chhungkua in kawnglaka kan eitur thehnem tak min pai phei a, Pa Madawnga ten thingpui tui tak min lo lum bawk a. Kulikawnah ṭhian ṭha leh chhungten pangpar leh puan nen min rawn thlahliam te kha a thlamuanthlakin a van hlu teh reng em! Pi Kulikawn te kan lo hrilh hre lo erawh kan hrilhhai dun tawn a, min tawrhpuina leh lainatna erawh kan hmufiah hle thung. Mabawiha leh Lalrina ten an motor in min chhawm phei a, kan hma lamah Pa Kungpuia fate an kal bawk a, khaw har lutuk lo in in khalh phei zel a.

Thenzawl ah chuan tûn hma atanga ka pa ṭhian bul lo ni ṭhin, Upa Ramchhana te nupa in thingpui leh pangpar nen min lo hmuak a, thla an ti muang hle mai. Thenzawl kan pelh hnu hian ngaihtuahna a kal thui nghal viau a, thla hmasa lawka beiseina sang tak nen Ambulance a kan in chhawm phei lai kha rilru ah a lo lang uar uar a. Khami tlai ni tla kha mawi em em mahse thi leh dam kara hringtu Pa chhawm kan nih miau avang khan a mawina ka pawh pha lo a. Thaw hah em em a zinkawng zawh mek Ka pa khan thlasik khaw nuam em em kha a hmu in a thlir ve reng si a, a rilru ah khan eng tak awm ang maw tih ka ngaihtuah nawn fo ṭhin.

Pukpui dai chu thim hma in kan thleng a, ṭawngṭaina mualah chuan beisei phakloh amak a maka tam College Veng ka ṭhian ten Motor sawm chuangin min lo hmuak a, lusun e ti lo chuan hlim takin kan nui leh ang bawrh bawrh a. Lunglei kan thlen a, ka pa min lo nghahna Biak In Hall kan thlen chuan khua a thim tawh. Ṭhian leh ṭhenrual ten min lo la nghak ṭhap a, Hall kan luh laia min tawrhpuina lantirna atana an lo ding vek te kha hmun dangah hian a thleng ve tawh ang em le. Lunglei, ka vangkhua nge nge ka tan hian i van hlu chuang bik tak em!!!

Darkar rei tak min nghah hnu ah thusawi hun min pe leh a, rei tak ka sawi leh pek a. Mahse ka ngaihtuah nawn leh pawn pawi ka ti ta lo, ka pa chanchin leh lawmthu sawina tur kha ka ngah ve em a ni. Kohhran leh khawtlang mipui te kaihhruaina leh uapna hnuai ah ka pa kha pangngai tak leh zahawm takin vuiliam a ni ta a ni.

Rei tak insum a, ka unaute hnem tûra ka inpuahchah hnu ah thlan khura ka pa, min hmangaih em em tu ka han thlah liam chiah kha chu ka insum zo ta bik lo. Thlanmual sir ah ka kal a, ka tap ta zawih zawih a ni.

Ka pa pual hian hriatrengna video kan siam ve a, lo thlir ve duh in awm chuan a hnuaia link ah hian a en theih e

https://youtu.be/cqbZblKMrXg

Pa ti mangang fapa, keimah...

MNF rammu lo haw hmuakin kan chhungkua Chanmari phei ah kan kal ve a, mipui tam tak karah chuan ka pa te ka bo ta tlat mai. Kum 6 mi chauh ka la ni a, mihring an tam si, in zawn hmuh mai mai theih pawh a ni tawh lo. Kei ka phur lutuk kha ka duh duhna ah ka lo vak kual vel a ni. Ka chhungte hmu zo lo beidawng kha kan in lam panin ka haw ve ta ngawt kha a ni a. Ka pa lo mangang dan tur kha aw!!

90 kum khan ṭhianpa Lala nen kan thiante hruaiin kawmthlang lui té ah kan kal a, Lala chu vanduaithlak takin a chesual hlauh a, a mawng ah hmawlh inchi 7 zeta sei a lut thawih mai a ni. Hmawlh chuan a ril a chhun pawp a, hlauthawng takin patling rual kan pun a. Thapui tak meuh nena an beih hnu in engtin tin emaw an la chhuak ta hram a ni. Kha mi ni a ka pa ka tih mangang zia kha, min hau nasa a sin aw..

Ka pa office kal tur chuan kan unau hnenah "Kawmthlang huan khu lo samfai ang che u" a ti a. Kei pek chuan inti fel deuhin, "Pa, keiman ka lo sam vek ang, ka u chu inkhel rawh se" awlsam zetin ka lo ti zung zung a. Tlai sikul ban a lo nih chuan kei ka inkhel a, ka u zawk chuan huan a lo sam daih a sin. Ka pa tan khan a van hrilhhai thlak dawn em!! Ka u tan khan ka ngeiawm lutuk dawn bawk.

Lungleiah Boxing Competition a awm a, pawl 6 ka zirlai a ni. Ka pa hriatpui miah lohin training vawi 1 pawh nei lo kha ka han in buk ve ngawt a, vawikhat khelhna ah ka la chak zui. Ka weight pui thiam tak tak an la ther fur mai si a, boxing kha insual ang deuh khan ka khel ve bawrh bawrh a, zuang auh auh paha hnek style bak ka thiam lo. Ring sira ka pa ṭang lutuk lo mangan si zia kha.

Sawrkar huanah kan ṭhian ho tuichengin kan kal a, khamah ka tla palh leh bik a. Ka khabe a kak kual vek a, thisen a chhuah nasat avangin Rahsi Veng tlangval ten min paw haw in, Civil Hospital Casualty ah min dah a. Kan ṭhenawmte Landline Telephone ah va bia in, "Tluangtea khamah a tla a, Civil ah an dah" ti a chanchin an va hrilh hnu chuan hmanhmawh baklengin Pi Ruali nen an lo tlan phei nghal a ni. Kei, khabe ṭhui zawh hlim kha OPD kawtah chuan Chawngzawng man tumin ka lo tlankual zak zak thung. Ka pa kha min hmuh hma kha chuan mangang ngawt ang.

Ráwlthar kan nih hnu ah ka pa nen a RX100 oil leak kan char dun a, chutia ka pa in a oil leak a char lai tak chuan a kick starter chu ka ninhleiin ka lo rap pek a. A kick starter invuahna bul bawk lai chuan Ka pa kut zungpui chu a zuk nawr pêr bawih mai a ni. Ka pa na ti lutuk kha a zuang zawk in ka hria, khami ṭum kha chuan ka pa chauh a mangang lo, keipawh kha ka mangang tak zet a ni.

Tlangval kan nih hnu ah pawh heng ka sawi bakah hian ka pa managang tak taka ka siam ṭum a tam mai, sawi vek chi pawh a ni lo. Ka zirna kawng zawh chhungchangah pawh ka pa kha vawi tam tak ka ti mangang ṭhin a ni. Amaherawhchu, khang kan hun tawng manganthlak tak tak ah khan ka pa kha chu a 'cool' raih zel a, ngaihdan nghet tak a nei ṭhin. Min hau na ngai lo in min zilh zawk thin in a tawpah chuan kan nui dun leh nge nge ṭhin a ni.

SAPRAM AṬANGA THIL THAWN - INBUMNA

Vawiin chu ka ṭhian hlui pakhatin min lo bia, Delhi Customs ah a bungrua UK aṭanga an rawn thawn a tan avanga min rawn bia a lo ni. Hetiang buaina ang chi ah hian call ka dawn ve nual tawh ṭhin avangin rinhlelhna lian tak ka nei nghal a, a harsatna tawh chu hetiang hi a ni.

UK atangin Catholic Sister anga in sawi hian Charity lamhawiin ṭanpuina rawn thawn angin a rawn insawi a. Chung a thil rawn thawn te chu Rangkachak tlereuh, Ipone, Laptop, US Dollar note engmawzat leh a dangte a ni. Chu parcel chu Delhi Customs ah an hrên avangin a khulna tur Rs. 25000/- thawn turin Phone call a dawng a, rawn be tu chu Delhi Custom a thawklai ni in a in sawi. Tin, WhatsApp lamah heng an thil thawn thlalak, Customs documents, Chhiah an chawi zat tur ziahna voucher, Custom officer ID etc an rawn thawn bawk a ni.

Inbumna thil a ni tih chu hre nghal mahila ka ṭhianpa lungdam chian zánna turin tunhma lama ka thawhpui ṭhin Delhi Customs a posting mek chu ka zuk bia a, a chunga thlalak ho khi ka thawn thla bawk a, Inbumna a nih thu chiang takin a rawn finfiah thei nghal a, Custom Officer ID a hming inziak ang chu an thawhpui loh thu a rawn sawi bawk a ni.

Hetiang inbumna hi tawng tawh an awm nual tawh a, theih ang angin kan lo inbuaipui ve ṭhin. Mizo te hi bum kan nih lohna atan a hnuaia point te hi ka han ziak chhuak ve a ni e.

1. Rampawn aṭanga thil thawn hi India Customs atanga clearance neih dawnin KYC tih fel angai ngei ngei. I parcel buaipuitu courier hnenah i hming leh Address tihchianna Adhaar card, Voter ID etc online in i submit a ngai. Chutiang i tih fel loh chuan an Custom atangin i address ah an thawn chhuak thei ngawt lo. Chuvangin KYC ti fel hmasa lo a Custom duty i pek a ngai an rawn tih mawl tawp chuan inbumna a nih i ringhlel nghal dawn nia.

2. Currency note, a bikin US Dollar ngat phei hi chu Parcela thawn hi phalloh a ni. US Dollar Note rawn thawn anga an insawi chan inbumna a ni tih hrechiang nghal ang che.

3. Documents an rawn thawn che kha uluk takin zirchiang la, a fake leh a genuine i hrehrang thei lo a nih chuan min lo be mai rawh, sawifiah vek a harsa.

4. Social media atanga ṭhian chhar satliah, sapram daiha awm lehnghalin ṭanpui a rawn chak viau che hi ring reng reng suh.

Engpawhnise hetianga rinhlelhawm thil i tawn chuan inthlahrung lovin min lo be tawp mai dawn nia. Ṭangkaina kan neih chuan kan lo infinfiahsak ang chu. Mahse Sorkar phalloh thil - Regulated leh Prohibited Goods chah ve ngawt, Customs a tang leh si ang chi hi chu inbuaipui awmzia a awm lo.