Staff Selection Commission kal tlanga hna hmu hi zofate zingah hian tam tak kan awm tawh ngei ang, chung zinga pakhat chu ka ni ve a, a exam kalkawng thui lutuk avang hian mizo thalai tam tak in an peih loh san thin, sum lama harsatna neih phei chuan a laklawhlaia tawp san mai awl tak a ni.
Staff Selection Commission hian kum tin Central Sorkar hnuai a Group B leh a hnuailama hnaruak hrang hrang hnawh khah nan exam a buatsaih thin a, Aizawl ah pawh Preliminary exam chu a pek ve theih bawk a ni. Khatia University atanga MSc ka’n chhuah ve hlawl lai khan hna thawh tur ka bangbo em em a, zirtirtu hna lah ka lo thawh silawng ve tawh avangin ka peih tawh der bawk si lo nen, Ka pa hnena Lungleia phei ngawt ai chuan ti in ka thianpa Jonathana nen Aizawl veng pakhatah mi inhnuai Rs 650 a luah in nun bul kan han tan ve rawih a.
Ka thianpa hian SSC exam a lo pek thin tawh avangin inzirnan pawh a tha ve reng reng e tih thu ah Combine Graduate Exam chu form ka han theh lut ve phawt a, inpuahchah ngaihna pawh ka hre lem lo a, nitina chanchinbu chhiar leh ka tui zawng deuh thuthar lakkhawm bak chu engmah reng ka tih belh lo. Thla thum hnu vel ah chuan exam a lo hun ta reng a, eng ang in nge zawhna a lo kal ang tih pawh hre lawk lem lo chuan Prelims chu ka va ziak ve mawp mawp a, exam vawi khatna a nih avangin ka tih that leh chhiat pawh ka hrethiam lo a, ka tlin pawh ka ring chhin lo hrim hrim. Mahse ka rin ai chuan chhan a nuam ka ti a har ka ti em em lo.
Result chhuah hun tur pawh ka ngaihtuah zui lo a, hetihlai hian Mizoram University ah Junior Research Fellow hna ka hmu thar a, nuam ti tak in Mizorama ramngaw hrang hrangte thla la leh thing leh hnim lakhawmin ka buai em em zawk a ni. Chutia ka kawng danga ka exam ka buai san lai chuan tuk khat chu ka pa phone call ka dawng a, Combine Graduate Prelim a ka tlin thu min rawn hrilh chu ka phu zawk a, ka exam ve tih chu ka hrechhuak ta chauh a. July 2007 thlatir lam a ni a, August thla lai hawla Mains exam tur a ni nghal bawk si, ka hnathawhna atang chuan ka tlan haw a, SSC Office Guwahati ka zuk phone nghal a, ka result tun maia ka hriat chauh avang leh Mains Exam Form ka dawn chauh avangin ka submit tlai a nih pawha min hrethiam turin ka zuk ngen a, vanneihthlak takin min lo hrethiam a, application form pawh chu a tukah ka thawn thla ve nghal a.
Inpuahchah tan a ngai lutuk tawh si, lehkhabu zir tur takngial pawh kei in ka la nei si lo. Ka pawisa neih chhun chhun nen Dawrpui phei ah ka tek phei ve nawlh a, SSC Exam lampang lehkhabu a lo vang em em mai leh nghal a, lungsi lo deuhin lehkhabu pakhat 2001 edition daih tawh hlui ung khuk tawh chu ka lei a, chu lehkhabu nen chuan chumi zan atang chuan ka inpuahchah ve ta a. Chhunlamah ka hna kal a ngai bawk, Tanhrila nileng hun zuk hman hnu a zan lama lehkhazir taimak a har zia chu MZU chhuak ho hian an hria ang. Tichuan keimah chuan ka bei ve tauh tauh a, mi tumah rawn tur ka nei lo na in ka roommate Jona khan min pui nasa em em a, a ni kha awm lo se tun dinhmun hi ka thleng lo ang.
August thla a lo ni der a, Guwahati ah kar hnih leh tlem cham tur chuan ka in ak chhuak ve ta a. Ka inpuahchahna chu a tha tawk lo ka ti na in, thla khat chhung kha chu lehkha ka zir ve khawp mai keima tawkah chuan. Christian Basti a Synod House ah chuan ka in pu lut ve rawih a, a thawk tute an lo fel bawk nen zirna hmun leh hun tha tak ka neih chhun zawm phah a, helai hmuna ka thleng hi ka hlawkpui em em a ni. Mains Exam tur hian mi 10 chuan chu mizoram atangin kan tling ve in ka hria a, mahse mi 5 bek exam kan awm lo. Kar hnih hnu ah chuan exam chu kan zo ve mai a, thawveng takin Mizoram lamah ka haw chho ve leh ta nghal a, ka tih that leh chhiat pawh ka hrethiam leh ta pek chuang lo, ka huphurh ai chuan a awl a, mahse mark score ka tumna Arithmetric ah ka che chhia a, Reasoning (IQ) Test ah erawh chuan mark 4 in ka solid lo deuh tih erawh ka inchhut thei thung.
He kan exam hi result a chhuak har em em mai a, kum khat dawn a rial hial mai thei a ni. A kum leh April thla ah result chu a chhuak ta chauh a, vanneihthlak takin ka tling ve leh ta, Mizoram atanga chuan mi 2 chiah kan tling chho tawh a, pakhat zawk chu Kishore Chakma tun thleng a ka thianpa duh tak lo ni ta hi a ni. May 2009 thla tawp lamah Guwahati ah bawk chuan interview turin kan chhuk leh ta a, hemi tum hi chuan ka huphurh tawh em em lo. Interview dawn zing ah ka wallet ka tih bo avangin ka tlai phawt a, vanneihthlak takin a roll no hmalam ka lo nih loh avangin ka chawl hahdam hman a. Kan hmel enpui mizo hnahthlak manipur lama cheng an lo ther fur mai a, keimah chiah Mizoram lam mi ka nih avang chuan hreawm ka ti rilru hle a, rual el a na duh khawp mai, ka Mizoram product pui awmchhun chu Kishore Chakma chauh chu ani a.
He interview ka hmachhawn hi a lawm nuam ka tih em em, tun thlenga ka la sawi nin theih loh chu ni. Ka subject of interest ah ka hruai lut fuh lutuk kha ka tlinpui chiang a ni. Environment lamah kan inzawt lut laklawha zawhna dang min zawh na chang pawh hre loin kan hun kan hmang zo ta kha a ni a, ka tan chuan vanneihna ropui tak a ni. Tun hnu a ka marksheet ka lakchhuah leh hian ka interview mark avanga tling ka nihzia hi ka hrechiang zual a ka lawm thar thin, Interview ah 78% mark ka hmu a lawm!!
May 2008 a interview kha Feb 2009 ah result a chhuak ta hram a, Hemi chhung hian nupui neiin fa pawh ka nei hman der tawh a sin. Pathian zarah ka tling ve ta hram a, Inspector of Central Excise ni turin min dah a, tunah hian kan chhungkua in ka post na hmun Chennai ah kan awm mek a ni.
