Ka zin thuam neih chhun Hnungpuak Ip chu ka bike hnungah chuan ka phuar hlawm ve nelh nawlh a, lengpui airport lam pan chuan ka inkhalh thla liam ve ta kha a ni a. "Ka thenawm nu in khawnge i zin leh pek dawn? Nang hi awm lai leh zin lai pawh hriat hleihtheih loh" ti a min zawhna pawh chu tlan pahin "Mamitah" ti in ka chhang a, ka inkhalh chhhuak ta a ni. Parawl tih takah ka in awm leh awm loh hi hriat hran ka har em bawk lah tak a ni. Aizawl hmun lar em em RV te, Phunchawng te ka tlan pel zel a, ka zinchhuah dan leh inthuam dan atang chuan ka zinna tur Ram hi rin dik chi a ni lo, India chhim khawpui CHENNAI ah ka zin dawn a ni e.
Lengpui Airport bulah hian thianpa pakhat ka nei a, thawt lawk leh hrilhlawkna pawh nei em em lo in a muhil lai ka zuk kai tho a, Dar 10 a ri tawh, "Chennai ah ka zin dawn a, ka bike hi in kawtah hian ka lo dah lawk dawn nia, Chahbi erawh keiman ka kawl ang" ka ti zung zung a, a mak ti leh a hawihai hmel phenah chuan bike chahbi kawl chak hmel te pawh chu ka hmu telin ka inhria. Mahse ka ngai pawimawh peih lo, ka hmanhmawh tawh a, ka kai tho a, engmah sawi zui hman tawh lo in amah bawk chu airport ah ka inthlah tir nghal a, tichuan airport ah chuan ka lut a ni ve ta reng mai.
Zin tur dang te chuan airbag leh suitcase nalh pui pui, man to hmel tak tak chu an rawn tiang erh urh a, "ka excess lo chiah chiah" ti a an khik vur vur lai chuan kei ve chu handy baggage nen chauh security check-in ah chuan ka lut awlsam thek mai a, a zia phian mai. "Mi hausa zinchhuak turin thawmhnaw an keng tun tun ngai lo, kan mamawh ang chu kan lei chawp mai a lawm" ti a ka thianpa sawi kha ka nihna chiah chiah ni ah ka ngai tlata rualawh pawh a nep deuh huai mai. RUM NUAI SAHDAH leh KUVA HRING ka pai chuan ka thla a muang tawk khawp a ni. Thlawhna chuan kan thlawk ve ta ngei a, ka vawikhat chuanna ni lo mahse thlawh chhuah dawn a mawng za erawh a lo la bo chuang lo, thuthmuna kan ip kang awk awk hnu chuan vansang lam panin kan invawrh chho ve ta a nih kha.
Kolkata ah kan tuma, Chennai lam pan tur chuan Howrah Station atangin Rel ka man a, ni hnih hnu ah chuan Chennai khawpui chu ka thlawk thleng ve ta a ni.
Chennai khua ah chuan thirsakawr intlansiak te, ke a inkalthui siak te, awm tih len te, san zawng leh rih zawng teh te ka zuk tih fel hnu ah, medical check up ka nei leh hnu chuan Sorkar hnathawk thei kan ni ve ta chauh a ni. Naupan lai tanga ka thianpa ni thin bula thleng ka ni bawk a, min duatin ka thla a muang em em a, a sum leh pai ah pawh min chhawk zangkhai in ka lawm tak tak a ni. Thingtlangpa khawpui fang tih takah Chennai leh a chhehvela hmun hming thang leh hmun pawimawhte min tlawhpui a, kei tlangval khawhawi mawl ve tak khan hmuhnawm tih ka van ngah tak em!!! An sawi dan takin Savawm pawh zan hnih thum chu kan vawhlum ve zan a nia, titi a ti tui a, tih chi tak a ni.
Tichuan a tawi zawngin sawi chhunzawm ila, ka hna zawm tura Call letter dawn hun nghak tur chuan ka thlawk haw ve leh ta vuah vuah a. Kar hnih ka thang bo hnu chuan Lengpui Airport chu dam takin ka tum ve leh ta a ni. Vawksa rep, bekang leh kuva hring ka lo chak ve hman khanglang a nih chu! Ka bike chu ka thianpa tih tur nei lo, khalh chhuak thei bawk si lo chuan a lo sil fai hliau mai a, a lo enkawl leh venhim manah ti in a tui sen Um khat ka pe a, lungawiloh thu sawi tur a hre tawh lem lo. Ruahsur hnuai ah ka inkhalh chho a, tluang takin Aizawl chu ka thleng ve leh ta a ni.
Kan thenawmnu chuan "Mamit zin nan kar hnih hnih hman a ngai lo, ranngo zawngin hmun dangah i tei rawlai a niang" a lo ti hmuar hmuar a, "Nia, a dik a lawm Chennai ah Bike in ka zin a lawm" ti rilru chung chuan ka in thim khup chu ka lut ta a ni.
