MIKHUALTE TITI

 

          Phairama chhungkuaa awm ve han nih takah chuan mi chi hrang hrang bawmtu hi kan nei ve nual thin a. Kei lah pek hi titi nuam ti a phulhlut chi ka lo ni bawk nen, ka mikhualte nen hian hun nuam leh hlimawm tak kan hmang thinin ka hria. Mizoram khaw hrang hranga rawn kalte an nih hlawm avangin tlang dung tih dan in ang lo te te kan hriatzau phaha, tawngkam bungraw mak pui pui rawn hmang chut chut lah bo lo nen, fiamthu ruahthamlohte kan hriat phah bawk a, nuam thei deuh mai a nia.

          Mikhual thenkhat chu tuilet hnua kan vawikhat inhmuhna te an nih hlawm avangin a tir lamah chuan kan ze tha ber (Character number one) nen kan han inhmachhawn phawt a, mahse a inpui nghaktupa ber hi eng teh ual ka lo nih loh avang hian kar pawh a liam hma in kan nui thler tlang leh uar uar nge nge thin a ni.

          A hmasa berah chuan Driver ka mikhual thu hi ka’n sawi teh ang. Aizawl atanga khawi khua emaw ni Sumo Driver a ni a, kawla ni chhuak chhiar a motor khalh thin a ni tih a ban puam atang chuan a hriat hliah hliah a, a tawng tam lo na in meizial erawh a heh hle thung. Zu erawh zu in duh miah lo a! He pa ka mikhual atang hian a lawm driver ho fin kherek chhuah dan zawng zawng ka hriat a, midang khalh tur atan chuan motora sumdawn ka tum loh tak ni.

          Driver pakhat chritmas dawna passenger duh thawh lutuk a sawi mawlh mai khan ka nuih a la ti za tawp thei lo. Seat a full thak tawh hnuah passenger an la awm belh zel si, a tih ngaihna tak pawh a thiam a sin, a passenger zinga motor khalh thiam ve pakhat kha a khalh tir a, a mah chu a chungah zu chuang hlauh a mawle! Titi dang han sawi kai tum pawh hian ka mikhualpa hian sawi tur vak hre hek lo a tawp a tawpah chuan motor chungchangah kan lut leh nge nge thin. A lawmawm vek e, ka hriat ngai loh tam tak ka hriat phah miau a lawm.

          Lawnglam engineer zir zo hlim ka mikhual tum ve thung kha chu tuipui lam kan hrut nasa khawp mai. Thla hnih lai min chamchilh bawk a, lawng engineering hi a theory chuan ka bel ve hman mai dawn a lawm. Sapram atang ngata rawn zir chhuak a ni bawk a, a hmel chu sap teh chiam lo mahse a chezia leh a tawngkam vel erawh hmuh sap riau tura hmuh kan nupa chuan kan han tum ngawt a, mahse kan hlawhchham. A sap thlawt lo a ni. Ka fanu kum 4 kha ‘A  for Apple’ a zirtir dawn emaw tih laiin ‘A for Alu pumchhum, B for Bawngsachek’ tih vel mai mai an inzirtir a, naupang lah hian thil diklo lam hi an hre awlsam zawk em em bawk nen a zia lo thin teh a nia. A laptopa a sapram thlalak min han hmuhte kha a beidawnthlak a sin, “hei hi kan campus a nih hi, He professor hian min duhsak a sin”  a ti dawn emaw tih laiin “Hei hi party a kan kal thin na hmun chu a nih hi, He nula hi a chhe lo a nia, He negro pa nen hian kan insual” tih mai mai bak kawhhmuh tur min nei lo.

          Doctor senior tawh mangkhen mai pawh ka mikhual tawh a, ka dilchhut lutuk kha min ning ang em aw? ka ti hnuhnawh thin a ni. He doctor pa hian kan sum min va han save sak tam tak em! Kan hnena a awmlai khan vanneihthlak  nge vanduaithlakm kan ti dawn, kan damlo chuah chuah mai a, doctor pan buai ngai lo in a ni khan damdawi min chawh a Pathian zarah (Doctor hming a ri leh ta lo!) kan dam hmiah hmiah zel bawk a, in mikhual fuh cher cher tak kan ni.

          A zaidam a, mikhual ber kha nu leh pa chan kan chan tir tawp a, a ni lahin a lo hnehsawh bawk nen, nihlawh tak mai kan ni. A ni hian natna mihring taksa a a lo luh dan leh mihring kan lo damloh tak dante chiang takin min hrilh a, chutianga kan taksa a damloh hnu a tihdam dan kawng awmte nen min hrilhfiah vek bawk a, engemaw chenah chuan ka var uarh mai. Mihring taksa te pawh hi khawl ang vek hi a lo ni a lawm mawle! Vai mechanic ho thiam chen  ai hian doctor ho thil thiam hi a sang teh vak pawn ka hriat loh phah a, an patient te an in pawimawh hleih thung tih mai chauh ni in ka hria.

          Tum khat dang leh chu computer thiam kan mikhual leh a, he pa hi all round ang reng, computer ai mahin eirawngbawl kha a thiam zawk mah in ka hria. Tih tur leh tih loh tur te kha a hre lo reng reng hi a ni ringawt, a laktlak lutuk kha kan nupa kan buai phah a ni. Kan mikhual room bang zawng zawng a lo hnawih thar vek a, a rawng bangin kan room a la rawn hnawih zui, kan hawihai a ni, hetiang hi a lawm mikhual bengvar an tih chu. Chu chang a la ni lo, arsa thin a thial min hlui ngun malh malh hle bawk. Internet connection a pawt bawka, a ni mikhual kha chu a tih chi vel vek hi a ni mai e. Sawi thui lo mai ang, a inti thei leh lutuk palh ang e.

          Mikhualte rel zui vak chu a tha lo e, duh tawk phawt mai ang, a tul chuan adang kan la sawi leh dawn nia. Mak deuh mai chu, kan hnena rawn cham leh rawn thlengte reng reng hi an haw meuh chuan kan ngai ngawih ngawih thin. Hei hi a chhan ber chu kan mikhualte hi an fel thei a, an hawihawm a, kan innel tawn em em tihna a lo ni.