"Englo Hnah"

Maharashtra khaw pakhat Hostela kan awmlai khan thil danglam tak a thleng a. Kum 20 chuang lai a liam ta bawk a, sawichhuah ngam ni tawh turah ngai ang.

Kan room ṭhenawmah hian Mizo tlangval pathum an awm ve a, pahnih chu tlangval fel tak, an chawrchhuahna kohhran ah pawh KṬP/ṬKP member ṭhahnem tak ve ve an ni. Pathumna ve thung hi chu hetiang lama hming chher vak chi a ni lo thung ang.

An pathum chuan eirawng an roomah chuan an inbawl chawp ṭhin a, zanriah an eikham apiang hian Ramlai tlangval fel pahnih chu an mut a chhuak nguai in, an ngaituahna a zâng riau thung a. An awmdan chu han insawisel na tur awm vak chuang si lo hian an ni deuh "huai" ṭhin. Nuihzat tlat zan te, ngaihtuahna kal ding vak zan te, lungngaih riau zan te an nei ta deuh reng mai a. Anmahni pawh chu an mangang ru viau ṭhin a, thi dawn tlata in hriatna te pawh an nei fo mai.

Kan rooma an zanriah eikham an rawn lenglut hi an rawn hawi buai tlat zel a. Lu hai deuh muai a an i hriat tlat avangin mangang ru deuh takin an lu chu an beng deuh dat dat thin. An lungphu pawh rang taka phu deuh zawih zawiha an hriat avang chuan hlauthawng takin an awm an chum leh dawt dawt thin. Chutiang chuan zan engemawzat an awm a, an thianpa ber lah chu engtinvak a awm chuang ngai si lo a, BP diklo leh che nasa ah an in ngai hmiah a, an ngaih a tha thei mawlh lo.

Ni engemaw zat a liam hnu ah chuan danglamna chang ve lo an ṭhianpa chuan sawichhuah phal miah loh thuruk tawp khawk min rawl ruk a, an chawhmehah chuan "Englo hnah" a telh ru ṭhin a lo ni. Thenawm tlangval pahnih chu an mangan em avangin 'Englo hnah' chu chawhmeha thlak tawh lo turin kan rawn a, chuta tang chuan an lo damtlang thei ta a ni.

Pynursla ka pa nen kan tlawh

Shillonga ka pa lo zin dawn khan "Penisula ah ka kal duh, min hruai ang che" a rawn ti a. Penisula khua chu nasa taka ka lo zawn hnu ah Pynursla a ni tih ka hrechhuak a, chu hmunah chuan kan va kal dun ta a ni. Chu khaw dái ah chuan Kuhva rah an sawngbawlna hmun ropui deuh mai a lo awm a, chu chu zir chian a duh vanga va pan vang vang kan lo ni.

Kan tána thil thar ngang a nih avang chuan a phûr em em a, an kuhva sawngbawl dan chu famkim deuha thla la tura min hrilh angin ka hmet kual char char a. Kan veng dáia a dil hmuna tih ve theih dan a zawng a ni. Amaherawhchu a hmunhma chu kuhva uih rim chhe zet chuan a luah khat hneh êm avangin Lunglei khaw dái a tih chi ah kan ngai ta lo a, kan bawhzui ta lem lo a ni.

Engtinnge ka pa khan khà Kuhva 'skâwp' na hmun kha Mizoram aṭang daih in a lo hriat le? A tuina zâwng hi chu a hre chat zel, ka pa khân. Amah avang khan thil chi hrang hrang ka tuipui ve phâk loh thleng thleng pawn ka hriat tam phah ṭhîn ngawt mai.

RAMHUAI LO VAT

Hmawngva lui kânin ral lehlam ngaw karah chuan ka pa nen kan lut chho a. Lo vah laia kawng an sahkuak chawp chu zawh chho in ngaw kara mual hnih kan paltlang hnu chuan lo chu kan thleng chho ta a ni.

Kan thlâm chu ramngaw hual vel veka awm a nih avangin khua chu a thim hma zual a. Zanriah buaipui leh sekrek eng eng emaw kan buaipui hnu chuan puar takin chaw kan ei a. Kan tihdan pangngai angin ka pa nen chuan kan titi leh hlut a, kan hmabâk leh hmachhawp chu tui takin a sawi leh suam suam a ni.

Lênghawn Ar khuan hun awm velah chuan ka pa chuan, “Mut zai i rel ang hmiang” a han ti a, kei nilênga vák chau tawh chuan ka lo hnial lem lo. Mu chung chuan a la titi chhunzawm zel a, zirna chungchanga ka kal zel dan tur leh a loneih dan tur chu a sawi tui ber a ni.

“Muhil tawh ang, Tluangte, mahse hei hi hre rawh, zanlai ah kan vau ah sawn Ramhuai an bengchheng dawn a nia, hlau miah suh ang che !” a han ti thut mai chu ka phu zawk a, amah lah chu a inlet buta, a muhil zui daih bawk nen, phur vak lovin muthilh chu ka tum ve ta a.

Patling aú ri ruah ruah leh thing kit ri rum rum thawm chuan min ti harh chiang hle mai. Ral lehlama thing lian pui pui tlu ri hum hum chu a ring ngei mai. A tlûk rual chuan a kit tute lah chu an hûk-aú ri luah luah bawk nen. Chang te an tum ri rawih rawih bawk a. 'Tu te nge zan zana Lo han vat chu le?' ti a ka ngaihtuah lai chuan ka pa chuan, “Ramhuai Lo vat an nih chu, naktuk zingah chuan engmah hmuh tur a awm chuang lo ang” a lo ti vat a.

Thawm ngaihthlâk nuam lo tak chu a reh hun nghakin kan pafa chuan kan mu meng reng a. Engemaw hnu ah chuan thawm chu a reh ve ta mai bawk in, lo vat ho haw thawm ri nak nak pawh chu ka hrechiang hle mai.

Zinga ka harh ve leh kan vau leh ral lehlam chu ka thlir vat a, zan lama an thawm nat teh reng nen Rawmngaw chu a hma ni a kan hmuh dan ang chiah chuan a lo la hring buk tha êm êm mai si a. Mak ti tak leh zawhna ngah tak chung chuan thlamah lutin ka pa zing thingpui sen thlum leh chaw ṭhing chuan ka va inhnangfak ve ta zawk a.