"Pa, i van rawn thleng har ve, i tluang vak lo a ni maw?" ti a kan zawh chuan, "Ka bike saw naktukah in unauvin in lo silfai dawn nia" ti in a zinkawng a tluan vak loh thu a sawi zauh a. Chaw te ei a, a insilfai hnu chuan a mu ta nghal mai a ni.
A tuk zinga kan unaua a bike, Rx 100 ngei mai kan va enchian nak chuan chirh hlawm hian a lo khat vek mai a lo ni.
A ke pahnih chu a lo puncture ve ve a, Bunghmun kawnga siamna a awmloh vang leh Handpump a ken loh avang chuan Sai-ip chansawm chu tlak-lei nem sawkkhawmin a bike ke chu a lo hnawhpuar a, chutiang chuan Lunglei thleng a lo tlan a ni.
Chumai a ni lo, Tleu Quarry bulah a tlusual a, Bike silencer sa chuan a chawnpuar a delh a, chesawn thei si lo chu a daih rak thleng a lo in delh tir pek a. Reife a tawrh hnu ah chuan a ngal inghahna lei chu a chemte chuan a theih ang angin a lai khuara, a ke chu ti che hret hretin a chhuak thei ta hram a ni. A châwn kan han ensak nâk chuan a lo kang so luai mai a, a tui ṭuam bawk nen, a na ngawt ang.
Ṭum khat pawh a zinna ah bawk a bike accelerator cable a ti chat a, a pawh a pawh theihin a rawn siam danglam a, chutianga harsa taka rawn inpawt kal chuan mel tam tak aṭangin a rawn thleng ve tho a ni. Ka ngaihtuah nawn leh pawh hian kut indaihlohna a sâng dawn hian ka hre lutuk.
Sorkar hnathawk a nih angin lungawi tak khan harsatna tam tak karah a hnathawhna hmun kha min chawmna turin a pan zel a ni.
