RAMHUAI LO VAT

Hmawngva lui kânin ral lehlam ngaw karah chuan ka pa nen kan lut chho a. Lo vah laia kawng an sahkuak chawp chu zawh chho in ngaw kara mual hnih kan paltlang hnu chuan lo chu kan thleng chho ta a ni.

Kan thlâm chu ramngaw hual vel veka awm a nih avangin khua chu a thim hma zual a. Zanriah buaipui leh sekrek eng eng emaw kan buaipui hnu chuan puar takin chaw kan ei a. Kan tihdan pangngai angin ka pa nen chuan kan titi leh hlut a, kan hmabâk leh hmachhawp chu tui takin a sawi leh suam suam a ni.

Lênghawn Ar khuan hun awm velah chuan ka pa chuan, “Mut zai i rel ang hmiang” a han ti a, kei nilênga vák chau tawh chuan ka lo hnial lem lo. Mu chung chuan a la titi chhunzawm zel a, zirna chungchanga ka kal zel dan tur leh a loneih dan tur chu a sawi tui ber a ni.

“Muhil tawh ang, Tluangte, mahse hei hi hre rawh, zanlai ah kan vau ah sawn Ramhuai an bengchheng dawn a nia, hlau miah suh ang che !” a han ti thut mai chu ka phu zawk a, amah lah chu a inlet buta, a muhil zui daih bawk nen, phur vak lovin muthilh chu ka tum ve ta a.

Patling aú ri ruah ruah leh thing kit ri rum rum thawm chuan min ti harh chiang hle mai. Ral lehlama thing lian pui pui tlu ri hum hum chu a ring ngei mai. A tlûk rual chuan a kit tute lah chu an hûk-aú ri luah luah bawk nen. Chang te an tum ri rawih rawih bawk a. 'Tu te nge zan zana Lo han vat chu le?' ti a ka ngaihtuah lai chuan ka pa chuan, “Ramhuai Lo vat an nih chu, naktuk zingah chuan engmah hmuh tur a awm chuang lo ang” a lo ti vat a.

Thawm ngaihthlâk nuam lo tak chu a reh hun nghakin kan pafa chuan kan mu meng reng a. Engemaw hnu ah chuan thawm chu a reh ve ta mai bawk in, lo vat ho haw thawm ri nak nak pawh chu ka hrechiang hle mai.

Zinga ka harh ve leh kan vau leh ral lehlam chu ka thlir vat a, zan lama an thawm nat teh reng nen Rawmngaw chu a hma ni a kan hmuh dan ang chiah chuan a lo la hring buk tha êm êm mai si a. Mak ti tak leh zawhna ngah tak chung chuan thlamah lutin ka pa zing thingpui sen thlum leh chaw ṭhing chuan ka va inhnangfak ve ta zawk a.