THIM ATA ENGAH

Ka bike chu thei leh thei lo in ka han tun ding a, rah nun tuma ka tha zawng zawng nen ka beih leh fe hnu ah pawh buh herkhawl hlui tawh herh nun tum ang maiin a ri dut dut a a thi leh hmuk zel a, ka beidawng tak zet tawh a ni. Khua lah chu a thim chhahin ruahpuivawnawn a sur buan buan bawk a, ka huh zawr vek tawhin ka chau tawh em em bawk a ni. Ka awmna chin pawh chu chiangkuangin ka hre hre lo a motor kawnghlui tumahin an zawh tawh ngai lohna hmun ah ka awm tih erawh chu ka hre thei thung. Fianrial pan ka duh vanga helai hmnun thleng hi ka ni a, midang hmuh ve loh tur thil ka tih ruk thin avangin mi tlawhpawh ngai lohna hmun pan pawh ka ni reng a ni.

Khua tanga Mel 4 vel laia hla a ni dawn ang, khatia ka damdawi ruih theih hmang a ka inchiu hnu ah khan ka taksa in a zo lo a, ka lu a hai miai miai a, ka hrawkah min hnawh a, ka khuh khek khek a, ka vel a thim mup mup a, nikhaw hre loin ka tlu ta a ni. Ka harh chhuah tirh chuan ka awmna hmun chu ka hre mai lo a, engtia helai human lo awm nge ka nih pawh ka hre mai thei lo, amaherawhchu ka damdawi hman bang baw niai nuai leh inchiuna hmanrua ka vel a lo let rem rum ka han dap fuh atang chuan thil awmdan chu ka hrechhuak chho leh uaih uaih a ni. Helai hmunah hian engtia rei nge ka awm pawh ka hre lo a, helai hmun ka thlen lai khan tlai lam a ni a, tunah chuan zan a ni tawh tih chauh chu ka hriat chhun a ni mai ani. Ka ril tam dan em em atang chuan engemaw chen chu helai hmunah hian thichhawngin ka lo let reng a ni tih ka hrethiam thei mai thung a.

Ka ke dinglam chu a vung puam lung a, hmun li hmun nga velah chuan ka invih sualna hnu pan so lei luai leh kaw her hur a awm thluah a, a na hlawm em em mai bawk a, ka ding rei thei lo a, ka bike tih nun ngaihna a awm tawh bawk si lo nen, ka na tuar leh chau chu ka thu ta hnawk mai a ni. Ka meizial ah lah chu a huh zawr vek a, lighter pawh talh alh zawh rual a ni lo. Ka ngaihtuahna erawh chu a fim em em thung a ni.

Kum 9 mi ka nih lai atangin Petrol leh Dendrite hnim ruih ka ching tan a, VDP vuak leh zilh pawh vawi tam tak ka tawk reng a. Kan tleirawl chho a, zu leh sa ah ka tuan leh a, chuta tang chuan tuna ka nun leh taksa ti chhe vek tu Proxyvon hi ka addict ta a ni. Damdawi ngaih chu a lo na mai lo khawp mai a, damdawi kan neihna tur a nih dawn phawt chuan engmah tih hreh hi ka nei lo a, a rem rem kan ru a, ruk loh theih thil pawh hi kan inchhungah hian a awm meuh lo a ni. Engkim hian man a nei vek a, kan chawchhumna Cooker hial pawh hralh duhna ka nei a, chhungte hawihaiin vawi tam tak ka siam a ni. Ka nu hi ka ngam ber a nih avangin a tuar nasa ber a, a puan tha zawng zawng ka hralh zo va, a inkhawm pheikhawk te nen lam ka ruk sak a, Silipar nena a inkhawmlai ka hmuh kha chuan ka rilru a na ve reng a ni, Mahse ka ti lo thei si lo a.

Nula hi eng atan mah ka ti lo a, tun thlengin ngaihzawng pangngai pawh ka la nei lo reng a ni. Mamawhna ka neih loh miau avangin nulat tlangval nun hi eng he hu ka ngai lem lo. Hemi piahlamah hian ka ke vung lek luk, pan tiam tuam hi tu nula mahin an duh lo ang tih ka chiang a, ka inkiltawiha ka hlimna ber damdawi chuan min chhawk hneh em bawk a ni. Broken family tanga rawn chawr chhuak ka nih miau avangin ka tan sual tinreng chu a in hawng a, ka duhna leh chakna chu thudang nise ka tan hian pan an remchang em em a, chu chuan sual min do hneh tir lo thin a ni. Vawi tam tak ka inngaihtuah ve thin a, sim duhna pawh ka nei thin. Tunah tak phei hi chuan ka na tawrh hi a nat em avangin ka nun hi ka ning ngawih ngawih a, damdawi hi keimah ngei pawh hian ka hua a ni. Mahse a zun zam, ka thisen ah a cham tlat tawh avang hian ka duh lohna chu hnehin a awm a, ka ti leh thin a ni. Chutiang ka nih tawh vanga tun dinhmun thleng hi ka ni a, he zun zam hian kum sawm chuang min phuarin min nghaisa tawh a, pianphung mumal lo min lo puttir tawh a ni.

Chutia ka inngaihtuah kual vel lai chuan ka lo chhing sek a, ka harh leh chuan khua a lo eng uar tawh a, ralkhatah chuan ka awmna lam rawn pana mi pahnih inbe mawlh mawlh thawm ka hria a, an lo kal hnai zel a, min rawn hmu thut mai chu an phu chiang teh a sin. Chumite nupa chuan min rawn bawihsawm a, nizan lama ka din pui ur ur theih ka ke dinglam pang chuan engmah reng a lo hre ta tlat lo mai. A mu chum chum a, hlauhthawnna in ka khat zui bawk a ni. Ka vela damdawi baw neih nuaih tang chuan engang mi nge ka nih chu min hrethiam mai a, engmah zawhna pawh min zawt thui lem lo chuan midang an pun a, damdawi in lam min panpui ta a ni.

Operation Theatre atanga ka chhuak chu ka harh mai lo a, darkar hnih hnu velah chiang lo ruai hian ka harh a, ka taksa chu ka han bih chiang a, ka ke dinglam chu dapfuh tur a lo awm tawh lo!!, an tan ta ngei a ni. Ka rilru na lutuk chu ka mittui a hnam sawk a, ceiling lam chu ka hawi chho a, chutah chuan Setana hian min rawn en reng hian ka hria a, min rawn nuihsawh em em ni hi hian ka han hmu a, ka thinrimna chu a puak keh a, Setan chu theih nise sawi sak chu ka chak em em a ni. Amah vangin ka nu leh pa an inthen a, kan unaute sual khurah an lut vek a, ka chhang chiah ka chan tawh bawk a, kei ngei pawh ramtuileiloin ka awm phah dawn ta a ni. Kan chhungkua leh keima chhiatna bul chu Setana hnathawh vek a ni tih chiang takin ka hre thar a, ka kut ka hum ruh a, thei leh thei lo hian, “Setan, Ka cho che…. Kan chhungkaw ti buai vek tu leh min nghaisa tu.. Setan tunah hian ka cho tawh che….Nangmah vanga hetianga awm hi ka ni, … tunah chuan hmun himah ka awm tawh a, Isua anchhunga awm ka ni tawh.. chuvangin .. Setan, KA CHO TAWH CHE A NI…ka nun hi I ti buai leh tawh lo ang..” ka ti chhhuak a. 


Ka khum bula thu ka nu leh Drip lo khai mawlh mawlh tu Nurse chuan min lo ngaithla renga ka mitmeng phe ruai kar atang chuan an bianga mittui lo luang ngiai ngiai chu ka hmu thei a. Ka khum lehlama damlo dang awmpuitu pa chuan ka kut a rawn hum a, Vanlam a hawi a “Lalpa,  hmelmapa Setana nghaisak hnu I fapa hian Nangmah a hmuh theih nan che a, hetiang dinhmun chhe bera I dah avang in lawmthu ka rawn hrilh a che..” ti in a rawn tawngtai a, ka muhil ta siai siai a ni. 

TITI PHUNGLENG-II

Kan ti ta sa sa, titi phungleng sawi leh mai mai  ang aw. Weekend te a ni bawk a, tih tur a vang phian a, kawm tur ka nei ve mang si lo a, kan puak chhuak leh pawp pawp ang e, thlasik mau puah ang in (an ti thin a mi khah?).

Zanin chu Manchester in Nomawi (k)an chawi ngei dawn a, inkhel en pawh a phurawm tawh khawp mai. Sunday tlai hi a tuka hnathawk tur nei tan chuan tlai sakei a ni ringawt thin. Chawlhni chawhnu atang hian a tuk hnathawh tur enghelh avangin lung a zing tan a, sunday tlai sa thing pawh inchuh a phurawm tawh loh thin. Hetiang boruak vel a nih lai a EPL en tur a lo awm hlauh hian ka nun ram nguai em em chu a ti phur tharin  rilru hahna pawh chu ka theihnghilh phah thin a ni. Mahse zanin ah hian EPL a tawp tawh dawn a, weekend pawh a khawharthlak dawn tawh khawp mai.

          
        English ho hian an club lianpui pui, hun rei tak atang tawha  khaw hrang hranga lo indinhhuak ho hi an ngaisangin an sakhua pakhat ang hiala ngai pawl te pawh an awm a ni awm e. Chutiang a nih lai chuan tun kum sawm chhung vel khan an club ho hi American leh Arab mihausa hnenah an hralh tawp tawp mai a, keini ang mi mawlmang tan chuan Kumpinu ram hi an economic dinhmun a tlahniam ta emaw ni le? tih mai awl tak a ni. Mahse mithiam ho in an sawidan chuan chutiang ang a lo ni awmzawng lo mai a, hetia an ram club an han hralh hian a leitute hian an theih anga nasa in an thanlentir a club hausa takah an siam ta thin a ni. Manchester City dinhmun atang hian kan hrethiam mai awm e.

          
         Club chu Immovable property a ni a, engtikawng zawng mahin England ram atang khuan khung club ho khu an sawnchhuak dawn lo a, sawnchhuah chi pawh a ni lo. Chutia club a lo hausak tak zelah chuan chu club awmna ram neitu hnenah chuan chhiah an pek a lo ngai ta a, club a hausak zawh poh leh sorkarin chhiah a hmuh chu a sang ting a ni mai. Chuti chuan sorkar chuan Arab Oil te chu indirect in a lei a lo ni reng mai a, chutiang bawkin America hausakna pawh a lo tawmpui reng mai a ni.

          Hei hi keima ngaihruatna a ka lo thlir dan ve pakhat a ni a, a that lohna leh diklohna pawh a awm ang. Comment ah duh duh a sawi zawm theih,  Titiphungleng a ni miau a.

INKHEL ROPUI

            Aizawl atangin team an rawn kal teuh a, tournament ropui deuh  Dhubi mualah a awm dawn tih chu keini ang vengmawng naupang pawn kan hre ve vek. A hun tur kan hre lo a, tlai tin inkhel ropui chu a awm tawh em ti in Dhubi mual lam pan chuan sikul ban ve leh kan tlan dawr dawr thin a ni.

Primary Sikul naupang chauh kan la ni na in inkhelthiam hming leh veng te kha chu kan khaw mi an nih chuan kan hre bel teh a sin. Goalie ngaihsan lai kha a ni bawk a, kan naupanlaia goalkeeper lar Vute-a, Bazar Veng te, biaktluanga, Chanmari te leh Thansanga MRP te kha kan hrechiangin an style zir reng reng hian kan khawthim thin a ni. Biaktluanga Penalty save dante, Vute-a dive dan nalh thin zia te leh Thansang kawr eng leh dum tial hak thin te kha ka mitthla an a la cham reng mai.

Aizawl atangin team pathum chu an lo kal ngei mai, PWD, AFC leh PHE an ni a, PWD team chuan track suit an neih avang in naupang zawng zawng chuan kan ngaisangin kan tan ber nghal deuh vek a ni. Lunglei lam team tha ho nen chuan an inkhel kual vel ta a, Lunglei team leh Aizawl team inkhelh tum phei chuan a boruak kha a sang thei teh a nia. Naupang ho kha chuan Lunglei lam ai khan Aizawl lam team kha kan tan zawk thin tlatin ka hria.

Mipui sang tam takin inkhel kha kan en thin a, dinna pawh awm mumal mang lo khawp a tawt te khan mual kotlang a rem lai lai ah kan inthiat khat tlat thin a ni. Nula leh tlangval te pawn a hu hova en kha an ching a, nu leh pa pitar putar thleng khan inkhel en kha thupui ber a ni thin a ni. Office kal pawn ban hma ruk chak an nei a, sikul naupang thenkhat pawh  inkhel en duh vanga lo tlanbo tawk lah bo lo nen, inkhel ropui awmlai kha chuan football pet chanchin bak sawi tur kha a leng thlawt lo a ni ber mai.

Mual kotlanga mipui chu an haw haw dur dur a, in au el leh fiamthu ring tak tak a thawh tawk an lo awm bawk nen, inkhel en kha mit a tlai a ni mai lo a beng a tlai a, boruak hlimawm tak kan chhim bawk a, hlawkthlak thin hle a ni.

Kum sawmhnih dawn a lo liam ta reng mai, Lunglei Football star engemaw zat pawh an boral tawh a, Dhubi mual pawh Thuamluaia mual tih a lo ni tawh a, Thuamluaia mual kotlangah hian inkhel en tur mumal pawh an awm meuh tawh lo, sawmhnih khat in kawng kal pah ten an thlir mai mai chauh a ni tawh a nih hi. Dhubi mualah kha chuan dinna pawh leng manglo khan kan inhnawh buk thin kha a ni a.

Hun a danglam tawh a ni, kan veng aia Manchester leh Arsenal kan tan hnu hian mi tumahin Dhubi mual inkhel tuman an en peih tawh lo a, an thiam awm reng, a inhmuhnawm hleih em mai bawk a ni. Mahse khang hunlai kha Dhubi mual ropui lai ber a ni hial ang. Veng leh veng in el em em leh tang em em a an inkhelh thin lai aia hun ropui kha a awm leh tawh pawn ka ring lo.

Thiam lo leh chiang kuang lo zeta ka han post ve rawihna chhan zawk a chu mahni kawtkai maia inkhel kan en peih tawh lo leh chakna leh phurna pawh nei tawh lo hial khawpa kan thangtharten ‘enjoy’ tur dang an ngah ta lutuk hi chu ka khawngaih zawk a, an vanduai tihna chen pawh ka nei thin.