THIM ATA ENGAH

Ka bike chu thei leh thei lo in ka han tun ding a, rah nun tuma ka tha zawng zawng nen ka beih leh fe hnu ah pawh buh herkhawl hlui tawh herh nun tum ang maiin a ri dut dut a a thi leh hmuk zel a, ka beidawng tak zet tawh a ni. Khua lah chu a thim chhahin ruahpuivawnawn a sur buan buan bawk a, ka huh zawr vek tawhin ka chau tawh em em bawk a ni. Ka awmna chin pawh chu chiangkuangin ka hre hre lo a motor kawnghlui tumahin an zawh tawh ngai lohna hmun ah ka awm tih erawh chu ka hre thei thung. Fianrial pan ka duh vanga helai hmnun thleng hi ka ni a, midang hmuh ve loh tur thil ka tih ruk thin avangin mi tlawhpawh ngai lohna hmun pan pawh ka ni reng a ni.

Khua tanga Mel 4 vel laia hla a ni dawn ang, khatia ka damdawi ruih theih hmang a ka inchiu hnu ah khan ka taksa in a zo lo a, ka lu a hai miai miai a, ka hrawkah min hnawh a, ka khuh khek khek a, ka vel a thim mup mup a, nikhaw hre loin ka tlu ta a ni. Ka harh chhuah tirh chuan ka awmna hmun chu ka hre mai lo a, engtia helai human lo awm nge ka nih pawh ka hre mai thei lo, amaherawhchu ka damdawi hman bang baw niai nuai leh inchiuna hmanrua ka vel a lo let rem rum ka han dap fuh atang chuan thil awmdan chu ka hrechhuak chho leh uaih uaih a ni. Helai hmunah hian engtia rei nge ka awm pawh ka hre lo a, helai hmun ka thlen lai khan tlai lam a ni a, tunah chuan zan a ni tawh tih chauh chu ka hriat chhun a ni mai ani. Ka ril tam dan em em atang chuan engemaw chen chu helai hmunah hian thichhawngin ka lo let reng a ni tih ka hrethiam thei mai thung a.

Ka ke dinglam chu a vung puam lung a, hmun li hmun nga velah chuan ka invih sualna hnu pan so lei luai leh kaw her hur a awm thluah a, a na hlawm em em mai bawk a, ka ding rei thei lo a, ka bike tih nun ngaihna a awm tawh bawk si lo nen, ka na tuar leh chau chu ka thu ta hnawk mai a ni. Ka meizial ah lah chu a huh zawr vek a, lighter pawh talh alh zawh rual a ni lo. Ka ngaihtuahna erawh chu a fim em em thung a ni.

Kum 9 mi ka nih lai atangin Petrol leh Dendrite hnim ruih ka ching tan a, VDP vuak leh zilh pawh vawi tam tak ka tawk reng a. Kan tleirawl chho a, zu leh sa ah ka tuan leh a, chuta tang chuan tuna ka nun leh taksa ti chhe vek tu Proxyvon hi ka addict ta a ni. Damdawi ngaih chu a lo na mai lo khawp mai a, damdawi kan neihna tur a nih dawn phawt chuan engmah tih hreh hi ka nei lo a, a rem rem kan ru a, ruk loh theih thil pawh hi kan inchhungah hian a awm meuh lo a ni. Engkim hian man a nei vek a, kan chawchhumna Cooker hial pawh hralh duhna ka nei a, chhungte hawihaiin vawi tam tak ka siam a ni. Ka nu hi ka ngam ber a nih avangin a tuar nasa ber a, a puan tha zawng zawng ka hralh zo va, a inkhawm pheikhawk te nen lam ka ruk sak a, Silipar nena a inkhawmlai ka hmuh kha chuan ka rilru a na ve reng a ni, Mahse ka ti lo thei si lo a.

Nula hi eng atan mah ka ti lo a, tun thlengin ngaihzawng pangngai pawh ka la nei lo reng a ni. Mamawhna ka neih loh miau avangin nulat tlangval nun hi eng he hu ka ngai lem lo. Hemi piahlamah hian ka ke vung lek luk, pan tiam tuam hi tu nula mahin an duh lo ang tih ka chiang a, ka inkiltawiha ka hlimna ber damdawi chuan min chhawk hneh em bawk a ni. Broken family tanga rawn chawr chhuak ka nih miau avangin ka tan sual tinreng chu a in hawng a, ka duhna leh chakna chu thudang nise ka tan hian pan an remchang em em a, chu chuan sual min do hneh tir lo thin a ni. Vawi tam tak ka inngaihtuah ve thin a, sim duhna pawh ka nei thin. Tunah tak phei hi chuan ka na tawrh hi a nat em avangin ka nun hi ka ning ngawih ngawih a, damdawi hi keimah ngei pawh hian ka hua a ni. Mahse a zun zam, ka thisen ah a cham tlat tawh avang hian ka duh lohna chu hnehin a awm a, ka ti leh thin a ni. Chutiang ka nih tawh vanga tun dinhmun thleng hi ka ni a, he zun zam hian kum sawm chuang min phuarin min nghaisa tawh a, pianphung mumal lo min lo puttir tawh a ni.

Chutia ka inngaihtuah kual vel lai chuan ka lo chhing sek a, ka harh leh chuan khua a lo eng uar tawh a, ralkhatah chuan ka awmna lam rawn pana mi pahnih inbe mawlh mawlh thawm ka hria a, an lo kal hnai zel a, min rawn hmu thut mai chu an phu chiang teh a sin. Chumite nupa chuan min rawn bawihsawm a, nizan lama ka din pui ur ur theih ka ke dinglam pang chuan engmah reng a lo hre ta tlat lo mai. A mu chum chum a, hlauhthawnna in ka khat zui bawk a ni. Ka vela damdawi baw neih nuaih tang chuan engang mi nge ka nih chu min hrethiam mai a, engmah zawhna pawh min zawt thui lem lo chuan midang an pun a, damdawi in lam min panpui ta a ni.

Operation Theatre atanga ka chhuak chu ka harh mai lo a, darkar hnih hnu velah chiang lo ruai hian ka harh a, ka taksa chu ka han bih chiang a, ka ke dinglam chu dapfuh tur a lo awm tawh lo!!, an tan ta ngei a ni. Ka rilru na lutuk chu ka mittui a hnam sawk a, ceiling lam chu ka hawi chho a, chutah chuan Setana hian min rawn en reng hian ka hria a, min rawn nuihsawh em em ni hi hian ka han hmu a, ka thinrimna chu a puak keh a, Setan chu theih nise sawi sak chu ka chak em em a ni. Amah vangin ka nu leh pa an inthen a, kan unaute sual khurah an lut vek a, ka chhang chiah ka chan tawh bawk a, kei ngei pawh ramtuileiloin ka awm phah dawn ta a ni. Kan chhungkua leh keima chhiatna bul chu Setana hnathawh vek a ni tih chiang takin ka hre thar a, ka kut ka hum ruh a, thei leh thei lo hian, “Setan, Ka cho che…. Kan chhungkaw ti buai vek tu leh min nghaisa tu.. Setan tunah hian ka cho tawh che….Nangmah vanga hetianga awm hi ka ni, … tunah chuan hmun himah ka awm tawh a, Isua anchhunga awm ka ni tawh.. chuvangin .. Setan, KA CHO TAWH CHE A NI…ka nun hi I ti buai leh tawh lo ang..” ka ti chhhuak a. 


Ka khum bula thu ka nu leh Drip lo khai mawlh mawlh tu Nurse chuan min lo ngaithla renga ka mitmeng phe ruai kar atang chuan an bianga mittui lo luang ngiai ngiai chu ka hmu thei a. Ka khum lehlama damlo dang awmpuitu pa chuan ka kut a rawn hum a, Vanlam a hawi a “Lalpa,  hmelmapa Setana nghaisak hnu I fapa hian Nangmah a hmuh theih nan che a, hetiang dinhmun chhe bera I dah avang in lawmthu ka rawn hrilh a che..” ti in a rawn tawngtai a, ka muhil ta siai siai a ni.