Kumpuisul tam a vei tawh hnu hian,
Lenrualhluite tualchaina kan vangkhua khian;
Lung min len a bang dawn nem maw,
Rualduh zawngte khan min dawn ve thin tak ang maw?
Tuantul vanga mual ka liam ni khan,
Tiang renga rei liamsan hi ka ring ngai lo,
Tunah erawh hun a lo dang ta a;
Run hmum rem zai ka rel ta e kawrvai zingan.
Lalpiancham a lo thlen chang ni hian;
Banzai rel lo tual kan chailai nite,
Panlai nun zamual liam hnu kha,
Thinlaian a thar thin tawn tur awm si lo hian.
Vangkhua chuan chang ni lo thlen hian,
Rihsang kai tawh hnu rawllai thianhlui lungduhten;
Min lo hmuak e chhuahtlang lungdawhan,
Hrilh a hai ngei e luaithli nul ka bang thei lo
Lengi run nui hiauva kan kaina hmun
Ninzai rel lo a tlaikhua kan varna zawng nen;
Rial ang an dai an chul zo ta;
Thalengi pawn khiangawiin mual a liam ta e.
Thlarau nun min chawmtu upa minte;
Lalber faka zai vawrpui thin zawngte,
Hawivelin tawn tur awm tawh si lo
In tel lo chuan Biakbuk run a kim thei mawlh lo.
Mahriaka han dawn chang ni hian,
Chuan leh ka ngam dawn nem maw kan vangkhua khi,
Thinlai dam si lo a kir leh ai chuan;
Lunglen zai ka vawr zawk nang e thlangkawrvaian.
(Tun hnai mai a boraltate ka naupanlai leh tlangval chhoh thlenga ka kawm thin ka thian duh tak tak, Telawma, Hmangaihsanga leh Lalthaa te Malaria leh TB a vanga rei pawh na hman lo a boral ta te tan he hla hi ka hlan a ni)
* ne maw tih chu "nem maw" ti chuan ka thlak ta e..
12 comments:
Hla phuah tha tak a va ni tehlul em!! I phuah mawi lutuk tlat...ka lung a tileng rum rum mai.
'ne maw' tih ai khian "'nem maw' tih a dik zawk lo maw ka ti dek dek chauh. nem hi hleinem kaihtawi ni se single invertet comma ' hi dah hmasa nghe nghe ta la..a poetical word sawt bawk ang a - te ka ti mai mai phuah thiam ve ta lo chuan...a mawi ka ti hle mai.
Ballad mawi tak tak hi in phuah chhuak thiam bik tlat mai hi in va fakawm em... Hei pawh a rilin a nalh lehpek hle mai. Inzir ve nan save hial teh ang
Ka lunglengin ka thiam ang tawka ka phuah a nih hi.. @RP Ne maw tih ai chuan nem maw tih chu a nalh zawk ang.. ka duhthu a sam famkim bik lo. In fak derna ah ka lawm e. @CyberThug in zirna a tan chuan a ril lo e mai :)
I va phuah thiam em em ve. Kawlkil piahlam rama runhmun rem chu khua a har duhin a lunglenthlak thin khawpin ka ring.
Hnathawka kan chenna hmun apiang hi kan khua a lo ni tih hi a dik ta berin ka hria, tunah chuan.
I phuah mawi hle mai thianpa! A châng tawpna phei khi a dik ngawt mai ka ti keipawh....han haw ve pawh hian kan mikhual deuh dûk tawh a ni deuh ber tawh mai si a. I tlip nalh lutuk bawk.gawt mai ka ti keipawh....han haw ve pawh hian kan mikhual deuh dûk tawh a ni deuh ber tawh mai si a. I tlip nalh lutuk bawk.
@RP Pachuau, i ngai mawh lai chu ka siam tha tawh e, i sawi khi a dik zawk ka ti kei pawn..
@Caribou, tunlai chu kan va reh tlang ve.. Khawi khua pawh ni se kan seilenna khua hi chu a ngaihawm bik a lawm ti raw..
@Jona, chhungte nena khawsa mumal tawh miah lo tur a retire thleng service hi chu a huphurhawm a ve a ni e..
ka comment chu a va nawi teh nuaih ve le...mobile net atanga tih a nia lo hrethiam mai teh
Hetianga thu thiam si i va inzep rei thei ve maw le!!
Mahse helai chang hi ka hrethiam chiahlo.
"Vangkhua chuan chang ni lo thlen hian,
Rihsang kai tawh hnu rawllai thianhlui lungduhten;
Min lo hmuak e chhuahtlang lungdawhan,
Hrilh a hai ngei e luaithli nul ka bang thei lo"
Hla thu ril tak a nih hi.
@Ramtea, Kan veng luh dawn hian thlanmual a awma chutah chuan ka thiante boraltate hi phum an ni nual hlawm a, kan veng luh dawn hian chu thlanmual chu kaltlang ngei ngei a angai a ni. Lungphun tih hi mi thenkhat chuan lungdawh tiin an sawi bawk thin.
Ka hrethiam ta.. damlai ina lungdawha lo hmuak che angin ka ngaih vangin 'rihsang kai tawh' tih hi a dikhlel deuh em aw ka tih vang a ni.
Tunah chuan ka hrethiam tawh e. Ty...ty
Va tha reuh ve a. Ka thinlai o VIT a lawm.
Lung a kuai raih mai.
Thian duhtakte sun hi a nuam lem lo viau ang. Ka tuar pui che!
Post a Comment