RAMRIAH THU

           Second term exam zawh ni chu a lo thleng leh ta reng mai. Phur em em in kan tlan haw a, thil dang pawh ngaihtuah chang lovin a tuka ramriak turin kan unau chuan kan inpuahchah nghal sauh sauh a ni. Ka pa poisa min pek chuan chini, dal, buhfai, sangha țin leh a dangte leiin bazar lamah kan liam nghal a, nghakuai pawh kan lei theihnghilh lo. Ka u pawn karkhat tla tur zozial a rukin a lei tih pawh ka la hre reng mai.

Zingkhua a lo var a, ka pa chuan zanlama a lo buatsaih tawh sa kan ramriah thuam leh kan ration tur chu RX 100 bike ah ngei mai chuan a tawn mawlh mawlh a, a tawn zo chu Sabengtung puak phur te pawh a ang leih lawih hle mai. Ka u nen chuan Bike hnungah chuan kan lawnkai nghal vat a, ka u phei chu a seatah a len ve loh avangin kan puakphurh chungah chuan a thu lawr vu a, engpawhnise a nuam kan ti in kan hlim zel e, ram kan riak dawn tlat a lawm.

Ka pa in ‘ka lo’ a tih awmna hmun, ngaihruatna nena kan lo suangtuah thin, a tak erawha kan la hmuh lem loh, hmawngva lui kam lam pan chuan kan liam thla ta a ni. Ka pa 'lo' chu mi 'lo' kan hmuh țhin, mual lian pharh dêi duai, buh leh vaimin ngir khupna angin kan lo mitthla thin a, mahse chutiang a lo ni der lo mai. Kan rí te nena kan inkar hmuh khawkrawk leh phihrit, hmun nâl em em ah chuan arhmaitiat lek hian a lo inpharh sawi ve leih a, kan tui lo țan.

Kan thlâm kan han thleng chu áwih a har khawp mai, hei lo hi thlâm lian deuh dang ka pa hian a nei lo emaw ni le? tiin thlâm lian deuh zawk chu kan han melh kual nghal ruai a, mahse a dang kan hmu ta lem lo, kan tui lo leh zual. Bêkte pawh tiat mang lo a ni a, a chhuatah chuan dâp mawih tawh lam hi a in phah ve a, rah zawngin kan tla hawlh mai ang tih hlauhawm a ni, mahse engmah kan sawi lo, ka pa thlâm neih ve chhun a ni miau a.

Hnuhkawih hnu ah vawikhat mah thlawh leh a la ni lo tih chu in hrilh ngai kher lo in kan unau chuan kan hria a, ‘a thial’ 'a thual’ an tih ang vel pawh kha kan ' lo' ah hian apply a ni lo hrim hrim a ni (Ka pa hian malaria a vei avangin a thlâm hi a ram in leh a lo hi a hnim a ni). Hnim chu a sang tawhin keini ang naupang chu kan pil lek lek hi a ni tawh a, kan han thlo te chu, thlo pawh kan ni chiah lo sâm hi kan ni ringawt zawk a ni. Kan hnim sàmthlukte chu kan rí lamah kan pu thla in kan paih zel a. Chutiang a nih loh chuan kan lo chu hnim sâmthluk chuan a khat mai dawn a ni.

Thosi lah chu a tam nangiang mai, kan taksa pumpui kan tuam in, kan vet chhuak chung pawh chuan kan hmaiah min la zar hram a, țah a chhuak țan lek lek tawh a ni. Hnim karah chuan sawhthing leh vaimim te chu kan sam/thlo chhuak ve zel a, Buh kan han thlo chhuak te chu kan hlim ta phian zawk a ni. Vanneihthlak takin kan lo hi ramchang țha a ni a, thlai awm chhun te chu an duahin an lian hlawm em em thung a, nikhat kan han thlawh meuh chuan kan lo chuan mi lo a ang ve tan a, thlai chi hrang hrang chu an lo lang ve ta suau a, kan phur țan ta hle mai.

Ka pa chuan a thlam awngrawp ve takah chuan min riahpui a lo tum bik lo a, kan rí a mi, a țhianpa, Pu Rova te thlamah chuan riak turin kan phei a, maian bai leh dal kan kan hmeh a, ka van ei hnem em!! Chawei khamah chuan Hmawngva luiah lenkhang kan zuk zara, naupang harh tih takah a zan a zanin tui kan han chen hram bawk kha. ‘Naktuk zingah engzat tak sangha awk ang maw?’ ti in nghakhlel takin kan mu ta a ni.

Zing kan tho chu thingpui senthlum leh chawtlang lian lenglawng nen ka pa chuan min lo ‘Good Morning’ a, tui ti taka kan ei hnu chuan lenkhang en turin lui lampang pan chuan kan liamthla leh ta a. A hmun kan zuk thlen chuan lenkhang chu lo tle suau in, len kan tih chet pah chuan a lo inperh noh noh a, chung chu sangha an ni. Kan va’n hlim tak em! Kan zuang a, kan au a, chiau chel chul chung chuan Nghahrah, Lengphar leh a hming ka hriat tak loh sangha dangte chu bucketah kan khung hmiah hmiah a, lenkhang panga kan en zawh meuh chuan kan bucket khai chu a chanve dawn sangha in a khat ta mai a ni. A nuam ta hle mai, kan hlim dawn chauh a ni.

Tukțhuan atan engemaw zat kan chhum phawt a, a bang zawng chu kan rep a, rapchunga sangha rep tlar țhap han hmuhte chuan kan hlim ngawih ngawih a, kan man ve ngei kha a ni bawk nen, kan khi reng tawh mai a ni. Nilenga hlo thlawh pawh chu a ninawm ta reng reng lo mai a, hnathawh bana ‘kuk’ ruah ruah te chu ramriak tihdan tur ve hrim hrimah kan ngai a, lui ruam khawk ruah ruah in kan ‘kuk’ haw ruih ruih zel a ni.

Vanneihthlaktakin intih palh leh in hliam palh pawh nei lo vin karkhat chhung chu kan riak tluan a, sangha man tur a awm reng bawk nen, kan nghakuai pawh chu hmanna tur hre lovin a ngai ngaiin a awm kar tluan ta a ni.

Kartawp a lo nih chuan haw kan hreh tawh ngawih ngawih zawk a, mahse kan sikul chawlhin a daih tawh loh avang chuan hreh chung chungin inrinni tlai khawthim dawnah kan veng lampan chuan kan inkhalh haw leh ta a ni.

Ka pa hi zirtirtu, sawrkar hnathawk a nih avangin a vawikhat loneihna a ni a, engkim inzirchawp a ni bawk. Kan lo kha phuailuai viau khan lang mahse vawikhat loneihna atan chuan a lo phuisui viau tho mai. Amah avang hian mizo loneih dan, a vah atanga a thlawh, a seng leh buh chil thlengin ka thiam phaha, hlawkpui ka inti hle. Khami kum ațang khan engemaw chhung chu lo kha a nei kum tin a, a pension hnu, tun thleng hian sangha dilte siamin chuktuah huan siam hi a țhulh leh ngai ta lo a ni.