Kawng tawi, rei si.

Chawhma dar 10 velah chuan Vapar khua kan thleng a. Hmelhriat neih chhun Pa Lura inah rei lo te kan chawlh hnu in Murlen pan chuan kan kal ta a. Khawchung lamah kan lawn chho a, metal loh, kawng nal chhe bawk si ah chuan, keini ang pa te tan chuan Yamaha FZ chu a rit lam deuh hlek a ni. Ka hma ah chuan thianpa Teruata chu a tlan zel a, a khuar a dai leh ka dai ve a, a chang leh kawngthlang kham lam hnaih tak tak ah chuan a tlan a, ko pang lam hrut thuak thuak a kan tlan chang a awm bawk nen, zin kawng bum boh tak chu a van ni teh reng em?

Chho chu a tawp thei tawh dawn lo emaw tih mai tur hian a thui a, Pik up tlanna hnu zawh kan nih avang chuan a kan duh dan ang pawn kan tlan thei lo a, hreh tak chunga tuihawk kan dai bawrh bawrh chang pawh a tam mai. Thing buk tak tak te chu kawng kham zawngin an lo zar de du bawk a, bike khalh paha kun zauh zauh a tul thin a, kun a ngaih lai taka kawng khuar hel a ngaih bawk si chuan balance kan hlauh a, tum lohna lamah kan pe tek dar dar thin. Kawnglaia tuihawk luankawr pik up dai khuarna chu kawng sir lamah a in paih liam a nih hlauh chuan ding meuha kal dan tur thlir vang vang a ngai thin bawk a, zawh sual palh chuan chuti hlauh. 

A kawng zal deuh lai kan han chhuak chho chu thaw a veng dawn emaw tih nak a laiin rin ang a lo ni leh ta lo. Tui hawk a lo li pum zel mai a, a hma a kan tih dan pangngai bawkin  “khawilam nge thuk lo zawk ang aw..?” ti a thlek vang vang a ngai thin. A ni lo lam pang vawi khat ka zawh pek a, chirh dum thuk ang reng takah ka tang a, thianpa nen bike ke hnu leh hma chawi meuha lak chhuah a ngaih phah a ni.

Ka hma a tlan Teruata chu chho nal ah a balance a hlauh palh a le, tih ngaihna awm tawh si lo, pui turin ka bike atangin ka chhuk thei mai bik lo nen, a rawn hnung tawlh thla auh auh mai a, a bike chu a pawm hian a rawn pawm ni ber in ka hria. Vanneihthlak takin a tlu thuai lo a, peih lo zetin a tawpah a tlu ta riai riai a nih kha. Vawikhat leh pawh chho laklawhah ka bike a thi thi thut mai a, ke lehlamin break ka rap a, a leh lamin ka in rah khalh thung a, break ka thlah chuan ka back liam ang tih ka hlau si, ka ke lehlam ka che sawn ngam tawh bawk si lo chu minute nga dawn ka hma tlan ka thianpa min rawn hmuh hun leh puih hun nghak chuan ka ding sai ngar ngar bawk a ni.

Rei fe kan tlan leh hnu chuan kawng chhuk kan thleng ta a, khua kan lut dawn e, ti in phur fahran hian kan inkhalh thla leh ta a, mahse kawng chhuk phei chu a lo harsa ber zawk a lo ni. A ke chu a in paih/tleng thla hruah hruah reng a, tluk hlauh vangin a chang chuan chak taka tlan thut a ngai a, a chang leh hniak chhiar meuha kan chhet chhet a ngai bawk nen, thlan fim a tla tha duh zawih zawih hle. Kan chau tawh chuan kan bike chu Bawng kaiha kaih mai kan duh rum rum tawh hial zawk a ni.

Ruam lama Murlen khua lo lang uar chu kan han hel fe phawt a, a tawp a tawp ah chuan kan tum ram chu kan thleng ta hram a, chawhnu dar 3 a lo ri reng tawh a ni. “Engtia hla nge Vapar khua kha?” ti a kan han zawh chuan “Km 13 chauh” ti in min chhang a. Kan thian dun chu kan in en a, kan nui ta ringawt a.