KHANGLAI HUNTE KHA AW...

         Scooter upa ve tawh lamah chuan a theih dan danin ka bungrua chu ka phuar khawm a, ruah a sur thulha a huh loh nana theletpuana ka tuam leh hnu chuan ka inkhal chhuak thei ta. Khawilamah? Ramhnuai ah ka research thilah ka vak lut leh dawn a ni.

          Ka Scooter hi upa ve viau tawh mahse a in zo ve zek a, chawl miah lova mel tam tak tlan vang vang pawh hian zu han overheat duh bik miah lo a mawle! Pawl sawm ka pass tirha ka class kal nana ka pa in min lei kha PhD tih nan thleng ka hmang tlang thei a, a service provide hi ka tan chuan a hlu teh mai a nia.

          Ka Scooter chanchin sawi chuan ka tui leh lutuk dawn, kan sawi tum ber lamah lut thuai ila a tha zawk ang e. Chutia ka han inkhalh chhuak leh chu ka kalna tur lam hriat nan map ka keng lo a, kawngkama midang zawh chawp chhoh a ni leh tawp mai. Mihring dawthei tak tawng palh ila chuan Mat vuaka Tuichang dap an sawi ang hlauh ka ni ta ve ang. Ka arkhawthim dai chho leh tawp dawn a ni.

          Digital camera rawn chhuah tirh lai kha a ni a, dawt sei reng ruang thlalak quality nei that hmel deuh, nei chuang mang si lo chu ka awrh chhuak ve ruau a, chu chu ka ropuina belh chhah nan thingtlang pa ho lakah ka hmang thin. Hmelin puak ti lem lo mahse ka Camera awrh chuan mi mit a la a, nuam ka tih phah ve riau thin, ka hlawkpuina em em phei chu sawi tur ka nei hran lem lo thung. Mizoram khawchhak lam pan chuan ka tlan chho ve vung vung a, rilru erawh  chu a muang zan thin lo, “engtikah nge kan chhiat thut ang aw” tih ngaihtuah reng renga inrin reng a ngai thung a ni.

          Kawngkama thing, hnim etc lo par reng reng chu eng thing nge tih pawh hre lo mahila Botanist ka nih miau avangin thlalak a ngai tlat. “Thing leh hnim reng reng hi hun bi neiin an para, an rah a, chu chu Phenology an ti a, Botanical identification atan an pawimawh lutuk a ni” ti a ka guide in a sawi kha ka hre khiau a, ka ngai pawimawh tur a ni tlat a ni. Chutiang a lo nih chuan nihphung hrang hrang an nei tihna a lo ni dawn a, chu an nihphung danglamna avang chuan an mahni pawh an danglam a ni reng a, an nihphung danglamna chhan chu an gene (chi) a danglamna avangte, morphology (pawnlam landan) danglamna avangte leh anatomy (chhunglam nihphung) danglamna avangte  ani a, hriat vek a ngai a ni. Gene leh Anatomy hi chu keini an duang thiam piah lam deuh a nih vangin Morphology tal hi chu uluk takin bei ang aw tiin thla kan la tlauh tlauh zel a ni.

          Ramhnuai ah kan han lut a, fur lai a nih phei chuan vangvat, thosi leh vaimite chaw ah kan inbarh lut hi a ni ringawt thin a, mahse vui thei kan ni lo. Doctor kan nihna lamtluang kha a ni miau a, Aizawl atanga ramngaw panna a hlat em avangin kan phur loh tum pawh ni se theihpatawpa ulukin thing leh hnim chu kan zir thin a ni (Zir thin tih lemah thiam chhuah tak tak erawh a beitham teh a nia). An tona leilung chu laboratory a test turin sarang ah kan la a, chhinchhiahna siam a lo ngai a, iptepuiah lei chi hrang hrang kan ak khawm ruih a, tih sual tum chuan kan chhinchhiahna a lo bo thul nen. Aizawl thlen hnu a kan han chhui nawn leh thin kha chu sual fe fe chu a awm thin ta ve ang.

          Chu thing bulah chuan enge to (Ecological Associates)? A bul vela hnim leh thing to chu an hming kan han la dawn a, a van buai thlak thin tak em! Mizo hian kan ramngaw a thing leh hnim te hi kan lo hrechiang tawk reng reng hlei nem maw le! Ram chin hria pa upa lam tawh ka hruai thin te pawh hian an sawi hlei thei thin lo. Botanical name chu sawi loh mizoramah hian hming nei lo hnim hi an tam lutuk a ni. Hmalakna tur a la tam khawp mai.

          Forestry research emaw taxonomical research emaw ecological research emaw pawh tih dawn reng reng chuan Inventory research neih a ngai hmasa thin. Kan thil zir bing tura kha kan hre hmasa phawt tur a ni. A awmzia chu, khawilai hnim chi khat emaw chanchin kan zir dawn chuan chu hnim Local name leh Botanical name tal kan hriat phawt a ngai a ni. Hetiang tur hian kan ram hian Data a la nei tam lo a ni. He buaina hi kei leh ka sangawizawnpui tam tak te buaina a ni reng a ni. Phuahchawp ta mai mai lah (k)an awm thin a, a loh theih si lo a, a zia lo thei khawp mai.

          Herbarium mawlh mai kha a ni ka nin thin chu ni. Herberium chu hnim hnah, par leh a dangte an pianphung ti chhe lo a dahro dan hi a ni mai a, hna hahthlak tawpthang a ni. A bik takin fur lai phei chuan khua a hnawng a, hnim hnah a tawih awlsam bawk nen, chutiang huna hnim hnah tih ro han tum chu hna hahthlak ni si lo ah chuan hna zawng zawnga ninawm ber chu a va han ni chiang tak em!

          Vanglaini chanchinbu, Telegraph leh TOI phek hlai pui pui kan phur luk luk a, chumi karah chuan kan thlai lakkhawm par leh hnah kha uluk takin kan rem a, damdawia kan phuh hnuin a behnghet thei tur ang berin kan han tawn ta thin kha a ni a, hnah hlai leh par bawr lian deuh lakkhawm tum phei chuan patling hian pangpar khawi hi kan zir thar leh a ni ringawt a lawm le. Nikhat dan zelah kan tuamhnanna lehkha chu thlak a ngai ziah leh nghal a, thlai tui pai tam chi phei chu a lo tawih/per chhe ang bei bui a, a then lah fanghmir leh sisen in lo bawm bawk nen, rilru hi an tihah hlawm ngawih ngawih thin teh a nia.

          Thlen in neih mumal loh tum te a awm bawk a, ka thianpa sawi ka zawm thin leh dik em em chu, “Thingtlangah chuan Ziritirtu inah emaw an khaw VCP inah emaw luh chat tur” tih kha a ni. Hei hi thudik kumkhua tur a ni in ka hria. Chawhmeh a tui deuh bik a, titi pui pawh an nuam thei khawp mai. Sawi tur a tam, nuihzatthlak leh hreawm tak tak kan tawn changte pawh a awm bawk thin, mahse hlim tak chuan kan tum ram chu kan thlengin ka tih tur ka ti zo ve zel thin kha a ni a. Hun lo liam zelah hian ka theihnghilhni a awm tawh lawng e khanglai hun hlimawm tak tak te kha…