Editorial

  Chennai Mizo Welfare Association hian Chanchinphek Chawlhni tina chhuak, "Chhimbal" tia a hming kan vuah, kan ngaihhlut ve em em hi kan nei a. Kumin lamah Editor te an lo inthlak avang leh Editorial Board-a permanent taka awm chawt ka nih avang hian naute ho in min duhsaka editorial hi min pa pek tawp mai a ni. Kartina Editorial han ziah chu a lo awlai reng reng lo mai. Nitina ziak ho hi ka ngaihsanna a zual phah a, thu leh hla leh khawvel an thlirna a lo zau zia min hriat chhuah tir a ni.

     Blog herlum ngai pawh ni pha tawh lo khawp a thing rei tawh, a kum a kum meuh khawihchet tawh loh ka neih ve kha maw ti in ka editorial thenkhat, mi zawng zawng huap deuh tur hi vawm bei thin ila tih rilru pu chungin hei a hmasa ber atan.....

                              Zalenna Ni…

     India ramin zalenna kan neih ni champhaphak vawi 67 na kan lo thleng leh ta reng mai. Ram tana zalenna sualtute kha he ni ah hian India ram chuan a theihnghilh loh zia a lantir a, chu zalenna avanga kan ramin hma a sawnna te pawh ram chhung hmun hrang hrangah a lantirin sawichhuah a ni bawk a. A lawman pui ber New Delhi ah phei chuan India hmasawnna hrang hrang ropui takin lantir a ni in Sokar hotu lu ber Kan prime Minister pawn thuchah ropui tak a sawi a ni.

     Zalenna hi hun lo in herin a rawn her chhuahpui a ni ngawt lo a, nasa taka sual a nih hnu ah leh mi tam takin nunna an chan hnu ah chauh kan neih a ni tih hriat a tha awm e. Zalenna nei thei tura kan hruaitu hmasa te beihna kalkawngah khan zum leh hriam tam tak an pal tlang a. A then chu hun rei tak chhung lungin ah te khung an ni in, hliampui tuarin zan tam an rum phah a. Thenkhat chuan an nunna hlu tak an chan phah bawk a ni. A va ropui em!

     Zalenna sualna kawnga an tawrhna dangte chu ngainep vang ni lovin lo dah that a ila, NUNNA hial chana bei tute kha an ropui chung chuang a ni. Ram tana nunna hlantute kha nang leh kei ang bawk a Nu leh Pa enkawl tur nei, Nupui fanau chawm ngai nei, u leh nau hmangaih tak tak nei ve tho te an ni. Nula leh tlangval thenkhat chuan hmangaih em em, ngaihzawngte pawh an nei ve ngei ang. Nang ang bawka hmathlir nei a, he khawvela mi ropui leh hlawhtling tak nih tum te pawh an nih ngei a rinawm bawk. Mahse chung zawng zawng chu pawisa lovin chhuan lo la awm leh zel tur ten zalenna kan lo neih theih nan an nunna hlu tak, anmahni pawhin an ngaihhlut em em chu an lo hlan ta a ni.

     He Ni, India Independence Day a lo thlen hian India ram lo ropui chhoh dan leh hma kan sawn dan te chauh ngaihtuaha chawimawi lo hian, he dinhmun min hruai thlengtu, ram leh hnam tana nunna hlantute kha i hre rengin i chawimawi zel ang u..

“Ram leh hnam tan hian NUNNA aia hlu leh ropui hlan tur mihring hian kan nei chuang lo e”