Andrew pualin, thla khat hnu ah

 "U Tluangtea tel lo chuan ka lu zai ka duh lo" i tih tlat avangin Kolkata ah min lo nghak fan a. Ka rawn thlen a i hlim zia te kha mitthla hian a la hmu vek a sin. I tana ka tlin loh dan leh i damna atana ka theihna tlem zia ka ngaihtuah erawh chuan ka lainat che a ni.

I luruh vuah leh te kha tih mai mai a ni hlei nem, i chhel zia leh natna tawrh zawng zawng kha min ti na thartu leh min vel tu a ni ta si a nih hi. Dam leh i in beisei a, ke a i kal leh theih i inring a, ke a kal zirtrtu atan min beseiin ka rawn haw hun i nghakhlel em em a nih kha. Mahse, ke a kal leh kha chu i tan chuan Pathian thiltih mak a thleng a nih loh chuan a thleng dawn lo tih nangmah zaitu khan min hrilh miau si a. Ka ngaihtuah let hian ka rinna te kha a van lo chau tak em! ka ti ṭhin.

Hmânah khan, ka parawl laiin ka bulah a thla a thla dawn te i khawsa a, ka bulah kha chuan i thla a muangin min ngaisang derin min zah em em a nih kha. Kan inbawl kual vel dan zawng zawngte kha nunhlui ngaihawm tak chauh an ni ta a nih hi.

Ka fate chanchin lawmawm leh nuihzatthlak te leh an thil thiam thar engkim ka share ṭhin na leh min hmangaihpuitu i ni a, ka fate tan pawh hian i van uiawm tak em! 

Chennaiah min zui thla a, nunkawng chhukchho kan han zawh dun a, khawlum kara i lehkhazir te kha mitthla an a cham reng mai. 

Drewpui, i nuna ka duh em em ṭhin chu maw, "Ka hauhna tur che leh ka thinrimna tur a ni tih hre mahla thu dik leh i thil tihsual palh i zep ngai lo a, i nihna ang ang ka hnena i sawi ṭhin kha a ni". "Andrew sawi a nih chuan thu dik a ni ang" tih kha kan nupa ngaihdan a ni ṭhin . Khatiang hringnun neitu chenpui kha chu hahdamthlak tak a ni.

 Drewpui, khawvelah hian i awm ta si lo a, thla khat lai min kalsanna a ni ta. Kan ngai bang lo che a nia. I U Tluangtea erawh hi chuan i dam leh theihna atan chuan engmahlo mai ka lo ni, rilru na takin kan thlahliam ta che a ni