ZARTEA THLAHNAN THU TLEM

“Vanchhawng” ti bakin min ko ngai lo a, keini lah khan ‘Zakir’.. ‘Jaune’.. ‘Bhaia’ ti khan kan ko thin bawk a, a ‘eih’ ve mai zel a ni. Pa fiamdawl, hlim reng thei, sawisel nei em em lo, thiante ngai pawimawh deuh chi a ni. Khatiang hringnun neitu kha misual tak a awm theih loh hrim hrim.

Thangkhat lian fe kan inhmuh ngai loh hnu pawha thiante la be pawp hmasa zawk zeltu a nihna khan a chunga kan sawi mizia a neih thuk zia a hrilhfiah chiang ngei e. Hman atang khan pa cher-ria leh chawrche ve tak a ni thin tih chu a landan ah khan a chiang mai a, a tleirawl chak ber lai pawh khan Football han khel ve thin mahse nek per awl chi pianphung nei a ni miau a, fiam pawh a hlawh nasa thin viau a ni, a haw ngao lem hlei lo va.

Ahmednagar ka thlen thlak tirh khan Zartea room ah ka invawmlut ve rawih kha a ni a, pa nelawm tih takah ‘Mate-a’ ti in kan in ko nghal zat mai bawk a ni. Ei luat ka tuar loh vang nge zan khat chu kawthalo leh luakin min zut hlauh mai a, Inthiarna Toilet a hla si, kei ka tlan ngun nen, vawi engemaw zat ka tlan hnu khan ka tlin ta meuh lo a, Zartea khan Toilet thlengin min kuah thleng a ni. Khami zan kha nimin ang maia chiangin ka hrechhuak a, lunglenthlak thil ni lo mahse lung a ti leng vawng vawng ta si a nih hi.

Room ah Toilet Bucket min chhawp a, tah chuan ka lam leh mawng lam atanga chhuak chu kan dawh ta ngawt a, kan tlaivar dun chiang teh a sin. Toilet Bucket Full load paihtu erawh kha chu ka sawi lo mai ang, amah a inhre tho.

Nagara kan hringnun hman ho dan kha sawi tur tam tak a awm, sawi vek tul lo te pawh a awm bawk a, keini rual ho kha chu kan innelin kan che na tlang hlawm a ni. Khang kan nunhlui hlimawm tak tak te kha Zartea awm tak si lo ah chuan a ngaihawmin a hlu zual  hle dawn ta a ni.

Kum tam tak liam hnu ah FB leh WA atangin min rawn zawng chhuak leh a, Block No 3, Gents Hostela kan inkawm dan ang tho khan kan inkawm leh a. Hun leh kum a ral hnu leh hringnun  hrang kan zawh hnu ah pawh kan indawr dan leh inkawm dan a dang chuang lo, chu chu thian nghet zia a ni reng a ni.

“Zarte, hahdam tak leh thlamuangtakin chawl mai ta che” tih bak sawi theih kan nei ta lo a nih hi.