THIHNA KUT VAWT MAW?

          Muang fan ruih maiin tlangchhipa Biak In dar chu a ri ruai ruai a, a rik zawh hnu lawkah chuan YMA tlangau a rawn au a, lui ruam thangkhawk rum rumin mipui hriattur thu a rawn puang a. Chu dar ri chu inkhawm kohkhawmna dar a ni lo a, tlangau lah chu hnatlang kohkhawmna tur pawh a ni hek lo, ka unaupa, ka kawmngeih, ka duhsak leh hmangaih em em Thangtea thih thu hriattirna a ni zawk a ni.

          Chumi lai chuan dai mai a luikawrteah ka insu a, chu thu ka hriat rual chuan mak tihna in ka khat a, ka insuk chu dahin, in lam panin ka tlan haw ta a ni.  In ka han thlen chuan ka farnu tih loh chu  tumah an lo awm lo a, tap pur chung chuan ka u te leh ka pa te Khawiva tuikhuah lama an tlan liam tawh thu min hrilh a, zawhna zawh thui ngai lo in ka unaupa chu tuiah a tla hlum tih ka hrethiam ta a ni. Mahse engvanga naupang harh vang leh tui thiam chu tuiah tla nge a nih? tih zawhna chu ka rilru ah a lo lut nghal thung a ni.

          Ka unau pianpui a ni lo a, ka ni fapa a ni. Mahse ka unau pianpui te aiin ka kawm tam zawk em em a ni.  Nikhua kan hriat theih tirh atangin kan inkawm chawt a, kan unau ho zingah kan mizia a inan avangin kan inkawmngeih fal bik a, kan harh dun em avangin hauh pawh kan tawk ngun na rawh e. A hma ni in kan sikul kal tur kan intawk a, “Naktuk chu khawiva dil ah tui cheng ang hmiang” ti a min sawmna te kha a aw ka hriat hnuhnung ber a ni ta. Khami ni teh reng khan engvanga ka pa khan tui chen phal lo nge a nih pawh ka hrethiam tawh lo, ka pa ngei pawn a chhan a hre bik chuang lo. Titau bur chungin dai hnai ah kan in suk phah ta a ni reng a ni. Khawiva ah khan lo kal ve ta ni ila chuan Thangtea kha ka chhanchhuah theih loh vek leh ka chhan tumna lamah kan in ham buai ang a kan tla dun ngei ta ve ang. Ka unaupa tuipui chhunga a pil tur chu ka en liam mai mai thei dawn si lo va.

          Tah nachang pawh ka hre lo a, chu thihna lo thleng chu ka pawm thei thlawt lo. ‘A ni thei lo’ tih bak chu sawi tur pawh ka hre lo a ni. Mahse ‘a ni’ miau si a. Ka insiam sawk sawk a ka nite in lam pan chuan ka kal a, tual zawlah chuan nula leh tlangval an lo phu suau suau a, inchhunglamah nu leh pa leh pitar putar thenkhat an lo zai tan der tawh. Rawlthar mai ka la nih avangin ka zak chu ka tawi khawmuang deuh a, reife ka hel hnu ah chuan ka lut ve ta hram a ni. Mut pindan chu a lo in thiat darh vek tawh a, ka unaupa ruang chu pindanlaiah zalhin puanvar hian an lo khuh a, a hmel ka va hmu chu tah nachang pawh hre lo kha ka aw rawl tawp chuan ka tap ta a ni. Awih loh nachhan tur dang a awm tawh lo, a ruang chu ka bulah engmah hrelo in a zal a ni.

          Naupan lai pawha tap tha duh mang lo kha ka aw rawl tawp chuan ka tap a, amah chu ka ko bawk a, mahse min chhangtu an awm lo. Ruang kila lo thu ve a pi leh a ni te chuan min rawn kuah a, lungchhe vankai tak meuh meuhin kan tap a ni. Thinlung atanga lo chhuak lungngaihna leh lungchhiatna chu a ruang chungah chuan kan leihbua a, mahse min chhawntu tur a awm tawh lo. Ka kut chu ka lek chhuak a, dimte in a chalah chuan ka va dawm a, mahse ka thlak nghal chiang kher mai. Tui tla hlum a nih avang chuan a taksa chu vur ang mai hian a lo vawt a, a khawng em em bawk a, pangtilum reng a awm tawh lo. Hei ngei hi a ni maw “Thihna kut vawt” an lo tih chu?

          Kum 15 lai a lo liam ta, a thih hlim chhawna nitin a thlan tawh thulh ngai lo khan amah theinghilh chang te pawh ka nei ta fo mai. Mahse vawiin, chatuan ram a pan champhaphak a lo thlen hian ka ngaihtuahnaah nimin ang mai khan a rawn thar nawn leh a ni. Tunah chuan nupui fanau ka nei ve tawh a, a ni kha zawng kum 15 mi lek ni khan fam dairial a chang ta nih kha.