LUNGLEN THU

Tupawh mai hian tunhma chanchin sawi tur an nei theuh a, mitin mai hian nunhlui lung ti leng em em tu an nei vek bawk. Hmangaihna avang emaw, chhungkaw nundan ah emaw leh zirna leh hnathawhna lam kawng thu ah emaw pawh ni se, hringnun hian nunhlui, a tawngtu in a theihnghilh theih tawh ngai loh tur a hnutchhiat teuh thin a ni. Chutichuan mihring hian kawng hrang hrangin lunglenna a nei a, chu a lunglenna chu a hun takah leh a hmun takah a rawn thleng thin a ni.

Vawin chu Bank ka dawrna lamah tleirawl kum 14 bawr vel hi ka hma ah hian a thu a, a nau ni awm tak mipa naupang nen chuan an titi dun melh melh a, chumite unuau chuan ka lung zu ti leng tlat a! 

Kum tam tak a liam ta. Vengmawng lam pan chuan ka chhuk thla hnak hnak a, ka tuichawi tur chu ka phur lo ngei mai, kawng a birin haw chhohlam mawlh chuan ka rilru a ti hah lawk a ni. A tawp a tawpah chuan tuikhur ka zuk thlengthla ve ta rawih a, chutah chuan hmeichhe tleirawl pakhat leh a nau mipa hi an lo insu a, chu hmeichhe tleirawl chu a ni, vawin a Bank a ka hmuh tleirawl nena in ang em em chu ni ! He mi ni atang hian he tleirawl nen hian kan in hre tan a, kum tam tak kan inzui hnu ah rihsang mual min liam san a ni.

Facebook group pakhat ka tlawh ah chuan tu emawni hian Mizoram thlanmual thlalak hi a rawn post a, chu chuan ka lung a ti leng em em a ni. Mizoram favang laia chawhnu lam thlalak a ni.  

Kum 20 chuang a liam ta reng mai, kan veng naupang ho tualchaina ber chu kan thlanmual hmun kha a ni. Thang kan kamna hmun a ni a, kan inbiruksiakna hmun a ni bawk a, Buk lem kan sak a, kan in umna hmun a ni bawk. Inthlanlung deh te kha a nuam thin a sin. Tin, vengchhak naupang leh vengthlang naupang ho indona hmun (battle field) chu kan thlanmual hmun kha a ni. Chung zawng zawng chu kumtawp exam zawk thlasik thawt tan tirh, favang tawp lama thleng thin a ni. Chutiang ang zawng zawng nunhlui chu he thlalak ka sawi hian min rawn hriat chhuahtira, panlai nun min ngaih thar tir em em a ni.