Tawpchin awmlo Pathian Hmangaihna

A vawikhatna atan Umroi Airport atang chuan Thlawhtheihna te chi ATR (Avions de transport régional), French-Italian siam chuan kan thlawk chhuak a, Kolkata thlenna atan darkar 2 zet a ngai dawn ti a hriattir kan ni a, dan pângngai ang bawkin ka phur leh zek zawk lo leh pek viau mai. Indigo Airlines nge nge an service a ṭhat ngai in a la tha reng a, Thlawhtheihna chhung a faiin Khualchhawn pawh hmuh an nuamin an nelawm viau a, Indigo hi ka thlangsual lo leh viau in ka in hria.

Runway-a chak mangkhena kan ving phei fur fur hnu ah chuan Thlawhtheihna hmalam chu kâng vu vu in vanlam kan tin chho ta vuah vuah a nih kha. Meghalaya tlang mawi tak tak chu a hmunah pawh a mawi tawh teh reng nen chunglam aṭang phei chuan a mawi chiang ngei mai. Tukverh aṭang chuan hnuailam chu ka thlir vawng vawng a, boruak sang taka in khawh chho mek mah ni ila tlangram in khawh mawi em em chuan boruak sang hlauhna leh zamna awm lovin ngaihtuahna a la peng hneh em em a ni. 

Luipui lian tak tak, a chhuahna leh pan lam hriat loha luang kawi nguai han hmuh chuan mit a  tlai a ngaihtuahna thui tak min siam bawk a ni. Hringnun pawh hi hnuai lama luipui luang ka thlir ang khuan kan chin hre lovin khu lui ang khuan kan luang a, kan tawpna chu kham sang tak pawh a ni thei a, tuipui lian tak min chîm raltu tur pawh a ni thei bawk e. Lung hmun chhengchhia leh Suar khawkrawk kan kaltlang chang tam tak awm bawk châng mahse zâl nuam taka hringnun a luan del del lai pawh kan kal tlang bawk ṭhin.

Kan thlawk sang chho zel a, a khalhtupa in tâwk a tih chin a sâng kan thlen chhoh hnu chuan a khawl rùm ri pawh chu a zia ta deuh a, a zâl zawnga inkhalh phei in chuan a hahdam zual a, rilru pawh a hahdam ta bawk e. Chhûm chungah chuan kan leng phei del del hian ka hria a, hnuai lam thlir chuan Parbawr ang mai hian chhum chuan a pâr a chhuang a, chumi hnuai hla takah chuan lei chu dal takin a lang a, kan thlawk sang tawh hle a ni.

Van sâng lam thlir chhoh chuan tawp chin awm lovin boruak zau tak chu a pharh duai a, Pathian ropui zia chu hrilhfiah leh chuan ka ngai lo. A ropuina kan hriatfiah lohna chuan a ropuina chu min hrilhfiah thung a; tawpchin nei lo a nihna chu he mihring finna, tawpchin nei hian a hrilhfiah bawk a ni. A hmangaihna chu a famkim in tawp chin nei lo a ni. Chu a famkimna chu mihring famkimlohna hian a ti chiang thung si. Chutianga mak, ropui leh chin nei lo Pathian neitu kan nihna ngei hi a ni kan nihlawhna chu!  "Ka Pathian ni awm reng i ni"  tih hla siamtu khan he hringnun, tlinna leh hlutna nei reng reng nei lo hian Pathian kan  mamawh zia a van hrechiang teh reng em!

Thlawhtheihna chuan hniamlam a pan ṭan a, inher kualin a insiam rem a, a thla parh duai chu a  van kawk zawng leh lei chhun zawng ten a lëi ang nawk nawk bawk nen; hetiang hunah hian rilru a phur sarh lo ṭhin. Kawlkila Ni tla suar suar chu a hnuai zawng ten kan hmu a, ni zung chuan hmai a rawn chhun a, chu ni êng chu a eng-sen suar a, a mawi chiang a ni. Duh taka Pathian thilsiamte hi hringmi hian a par kan chen nasa in kan vannei bik a sin. 

Vàn lam hawia min leu pui lai chuan vansang tawp chin awm lo chuan lairil min fan a, tawpchin awm lo siamtu hian hmangaihna tawpchin awmlo in min hmangaih si a. Chu hmangaihna changtu chu kei hi ka ni ve mai a. Phuloh hmangaihna hlu em em dawngtu leh changtu chu keimah, ka chhungkua leh lei mihring zawng zawng hi kan ni, lawmna tawp lova láwm tur kan van ni rua em!

Vansâng tak aṭang chuan lei lam panin kan hniamthla hret hret a, chutichuan tluangtakin Runway ah chuan kan tum ta a ni. Ka rilru leh taksa chu leiah nghah rual chuan ka ngaihtuahna pawh lei ngaihtuahna a ni leh ta a ni. Chunglam sâng taka kan thlawh laia ka ngaihtuahna fim, fiah leh chiang em em chu mit zawl aṭanga thlirna hmuna ka awm hnu chuan a dang leh ta daih mai. Mihring hian kan mit zawl aṭanga he khawvel leh a piahlam ram hi a lo fiah ngai lo; kan chimchin, kan thlirna aia sang hret aṭanga kan thlir chiah hian kan thil hmuh a lo dang ta ṭhin a ni. Van leh khawvel hmun tina awm hian min van hrechiang dawn tak em!

Kolkata ah hian ka nau Andew-a, stroke avanga pangkhing zeng, a nunna chhan nana a luruh an zai hawn, chu a luruh them ama puma an dah ṭhat vuah tura kal kan ni. Khawvel thiamna tawp chin kan thleng tawha chumi piahlam beiseina nena thawkchhuak kan ni. Doctor te thiam leh theihna baka theihna leh tawpchin neilo finna neitu hmangiahna a khat kan Pathian rinchhanin ṭawngṭaina nen hma kan la dawn a, kan zama mahse kan beisei a sang em em thung a ni.