Chhim mi hrâng, Pu Hranghrima (Dr Lip) sûnna atan

Chhim mi hrâng, Pu Hranghrima (Dr Lip) sûnna atan amah nena kan hringnun hman tlemte hi kan sawi ve teh ang:

Nikhua ka hriat tirh aṭangin chhungkaw thiltihna apiangah a Video Camera lianpui pu kual in kan inah a rawn chuangkai fo va. Naupang ho kha a âw thûm dút khan min chhaih kual ṭhin a, kan ngaisang thei hle a ni. Kan lo upat hnu thleng hian Chunglam aṭanga a dawn hmanga Pathian thu hrilhfiahtu Ziaklama mi hrâng, Hranghrima chu kan ngaisang zual zel ta a ni.

Ka cousin Thangtea (Fam) nen khan kan harh fal bik em a vangin min chhawnchhaih nasa zual a, "Cowboy deuhin thla ka lak ang che u" min ti ṭhin.

Vawikhat chu ka nu Second Hand ka zawrhsak laiin dawr ah a lo kal a, "Tluangte, Kamis Cowboy deuh i zuar lo maw?" min rawn ti leh a, Kamis Cowboy deuh chu kan zawng dun a, kan hmu zo lo a nih kha.

Kumthar hmanga Lunglei hmanni a ka haw khan ka tlawh a, kan titi dun hlutin thil chi hrang hrang ka zawt a, ka kawm hnuhnung ber ṭum a lo ni ta reng mai. "Pu, Makedonia a Zawhna leh Chhanna i buatsaih hian Bible Commentary i râwn ve em?" ti a ka zawhna chu "Rawn lem lo e, Chunglam Commentary min pêk ang hian ka chhang mai" ti in min hrilh a, ka ngaihsanna a zual hle a ni.

Ka pi (A nupui) kha biak rin a ngai an tih avang khan ring deuh deuh khan ka bia a, chutiang bawkin amah pawh chu ring deuh deuhin ka be chhunzawm ve ngawt a, a beng bulah te khan ka zuk ṭawng vel bawk thul. A ngaihdan kha a ni ta chiah lo a niang "Kei chu biak rin ka ngai ve lo" a rawn ti mai chu, lo ngaihsan leh zah ruk teh reng nen ka lai lutuk kha khuk ral chem chem a chakawm.

Thla la dun ang ti in ka sawm a, "Ngawi teh Cowboy deuhin i la dun ang, ka cowboy lukhum kha min han pe teh u" ti in a tu nu chu a ko a, thla kan la dun ta a ni.

Ka bulah khan Cowboy kha a sawi ngun viau a, eng a sawi tumna ber nge ni ang tih ka ngaihtuah ṭhin. Pa hrâk ngaina mi, mi lem lo ve tak, nihna ang ang a lang mai chi, chhungrila finna leh hriatna sâng tak nei thung si, ama ṭawngkam takin theuneu lo deuh chi kha a ni. Chutiang a sawina te pawh chu a ni mahna.

Ka mitthla let hian Dr Lip kha suit nena a induan zaih hi ka hmuh awm ka hre tlat lo, simple takin Kamis ṭial a ha a, Velvet kekawr tlawn a ha leh mai a, pawnlam landanah khan a buai ve lem lo. Mahse a hriatna leh thiamna Mizo mipui te tana chhawpchhuak tam ber pawl a ni hial ang.

Ka pu, ui in mamawh rih hle che mahila Van kohna i chhan hun a thleng ve ta miau si a, i hnathawh ropui tak hnutchhiah hi Mizo hian a theihnghilh tawh lo ang.

Rest in Peace🌹