ARSI ANGIN

(Missionary Saktea, a rawngbawlna hmun Arunachal Pradesh a Covid-19 hripui avanga boral ta pualin)

Thuziak tam tak a awm tawh a, sunna thu tha tak tak an ni hlawm. Kei, a hmelhriat ve satliahin Saktea chanchin leh kan hun hmandun dan lo ziah ve kha ka inthlahrung a, ka ziak chhuak ta lo. Ka thinlungah erawh chuan chiang takin a in ziak a, ka thup bo phal ta lo a ni e.

Hna avanga kum 2014 a Shillong ka pem luh tirh khan Saktea hi missionary smart leh fel em em  tiin ka ralkhat hriat tan a. Kohhran Rawngbawlna huang ka luh ve hnu a, amah ka belhchian hnu khan pa inngaitlawm, biak hmasak hman loh, invawng felfai em em, rawngbawlna a chiang a ni tih ka hre chiang zual a ni. Amah sunna thuziaka an sawi zawng zawng kha a dik vek.

Guwahati-a kan office-pui dawra ka zin apiangin ka tlawh loh pawn ka call deuh ziah a, an inah te leng lut fo in, ama enkawl Baptist House-a riah chang te pawh ka nei thin. Amah kha ka ngainat zawng a ni a,  ka ralkhat hriat tirh leh amah ka hmuh hnu atang khan a hmelhriat leh a thian nih ve kha ka chak a, chu chu amah ka ngaihsan vang leh a nun tlawm em em kha ka ngainat vang kha a ni. Amah ah khan Isua hmel a lang miau a ni. Kawm a nuamin a hahdam a, mi chanchin a chhe zawnga sawi ngai lo, mi tlawmngai leh tanpui ngai tanpui inpeih reng mi a ni.

Kum tam a lo liam hnu chuan min transfer a, a ni pawh an lo transfer tawh bawk a, Shillong ka let leh meuh chuan Arunachal lamah a lo awm daih tawhin, kan inhmu ngai ta miah lo. WhatsApp a kan inbiak hnuhnung ber chu Sept 2020 kha a lo ni daih mai. Covid hripui a lo lian a, Saktea pawn a kai ve thu kan lo hriatin kan tawngtaipui a, taksa chak lai leh mi hrisel a nih avangin a dam leh mai kan ring a. Damdawi In atanga a chhuah thu kan hriat hnu lawka a thih thu kan hria kha chu awih a har in sawi tur reng kan hre lo a ni, min deng na lutuk. Zawhna tam tak a lo lut nghal a, “Engatinge Saktea kher?” tih zawhna chu. A chhanna ka hre lo a, vanram ah bak kan hre dawn ta lo a nih hi.

A chhungte duhdan leh remruat angin a ruang chu Aizawl Bungkawn thlanmuala phum turin phurh chhoh a ni a, In a luhpui lovin thlanmualah a ruang chu zanlai ah tlangpui nghal a ni a, vui nghal tura tih a ni. Guwahati-a awmlaia damlo tamtak buaipui leh tanpui ngai lo tanpui thintu leh Mizo ruang tam tak lo thawn haw tawh thin tu, Saktea chu buaipui a ngai ve ta. Zah leh chawimawi phu em em mahse Hripui avangin a remchang lo a, a hun tawp thlengin lansarh leh chawimawi hlawh loh turin a lei taksa chu Zoram lamah phurh chhoh a ni ta a ni. Mahse mite thinlungah Lalpa chuan a va chawimawi chiang si em!

Youtube lama vuina program live chu kan chhungkua in kan thlir thap a, Pathian hretu leh zuitu, Rev Zatawna te chhungkuain an fapa leh unaupa; pasal leh pa duhlai an thlahliam chu Mizo mipui in kan hmu a, lusun an ang lo a, zin haw leh tur ang maiin an thlahliam a ni. He lei hi kan khualzinna ram a nih zia an chhungkua chuan YouTube kaltlangin min rawn hrilhfiah a ni. An ngai lo a ni lo a, an ui lovin an sun lo a ni hek lo, he lei hi kan kumhlun lohna ram a nih zia an hrechiang em a ni. Ropuina rama Saktea kaisanna chu lawmna ah an ngai a, an mihring thinlung chu a lawm bik lo ang, mahse an thlarau a lawmin a hlim miau si a, chu chuan an lusun chu a hliahkhuh hneh em em a ni.

Mihringte ngaiha ropui taka vui a ni lo a, a kuang zawntute pawn hri laka invenna PPE in an inthuam a, ka thianpa taksa tlawm tak chu mihring ngaiha khawihserh a ni a, chutianga vui chu a ni. Amaherawhchu a thlarau in van kawtchhuah a thlen meuh chuan mi thianghlim, Lalpa Pasalthla rammu hlawhtling ber haw angin ropui taka hmuah a ni ngei ang. Mittui nena kan thlah liam lai hian hlimna vawrtawp nen chatuan ram chu a lut dawn a ni. Van nun leh lei nun hi chu a van in ang lo em!! Krista Pasaltha kal hmasate nen kumkhua atan vana arsi te angina an eng tawh dawn a ni. A hmufiahtu te thinglung mitah pawh Arsi angin he lei ngei ah pawh an eng reng tawh ang.

“Tin, a fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw tlaitluanin an êng ang”